Canada Trudea nunap inoqqaavinut utoqqatserpoq
Katersuunnermi killitsisimaarnartumi ministeriuneq Justin Trudeau sassarluni nipituumik ersarittumillu Paggivittami Vaalimi oqarpoq: "We are sorry, Canada is sorry" - Utoqqatserpugut, Canada utoqqatserpoq.
Paggivittami atuarfiutigalutik angerlarsimaffiit tallimat naggueqatigiit Inuit Innu inidianerillu meerartaasa atuariartortitaasarfii tusamanerlugaapput.
Paggivittaq Newfoundlandilu Canadami provinsitut 1949-mit aatsaat ilaalermata, atuarfiutigalutik angerlarsimaffiit oqaluffeqarfinnit nunallu immikkoortuisa naalakkersuisuinit aqunneqarput, taamaammat Paggivittamiut Canada naggueqatigiinnut Inunnut 2008-mi utoqqatsissuteqarmat ilaatinneqanngillat.
AAMMA ATUARUK Justin Trudeau nunap inoqqaavinut utoqqatserpoq
Taarsiivigitissasut
Paggivittamiut Inuit indianerillu ukiuni qulini Canadap naalakkersuisuinut eqqartuussivilersuussipput. Ajugaappullu.
Naggueqatigit Inuit Innullu 960-iusut 245 millionit koruuninik taarsiiffigitissapput.
Immaqali atuarfiutigalutik najugaqarfinni misigisaat tassa kinguaassiutitigut, tarnikkut timikkullu atornerlugaanermut aqqusaagaannut pisortatigoortumik utoqqatsissuteqarneq pingaarnerpaavoq.
AAMMA ATUARUK Trudeaup Canadap inooqqaavinut neriorsuutini eqquutsikkaa
Obed Trudeaulu eqitaartut
Justin Trudeau utoqqatsissuteqarami qialluni meeqqat angerlarsimaffiutigaluni atuarfinnut nassiunneqaramik oqaatsiminnik, kulturiminnik, ilaquttami asanninnerannik nakkutiginninnerannillu arsaarneqarsimanerarlugit oqarpoq.
Pisimasullu nunasiaatilittut iliuuserineqarsimasut qaqugumut peqqinngisaannassanerarpai.
- Canadap oqaluttuarisaanerani immikkoortumik nutaamik aallartitsisariaqarpugut, tassani uagut ataatsimoorluta saammaateqatigiinnissamik anguniagaqassaagut.
Meeqqat angerlarsimaffiutigaluni atuarfik sinnerlugu Toby Obed Hopedalemeersoq oqalugiarpoq. Taanna Paggivittamiunit eqqartuussivitsigut sorsuutiginninnerpaavoq.
Tobe Obed oqalugiarnermini arlaleriarluni qissasertarpoq. Toby Obed Justin Trudeaulu oqalugiarnermi imminnut eqitaarput.
Katersuunnerup pinnginnerani utoqqatsissuteqarnissap akuerineqarnissaa qularineqassappat Toby Obedip Paggivittamiut isumakkeerfiginnittartuunerarlugit oqaatigaa.
- Taamaammat utoqqatsissuteqarneq akueraarput, naak arlaannit akuerineqanngikkaluartoq.
