Trudeaup Canadap inooqqaavinut neriorsuutini eqquutsikkaa

- Nunap inoqqaavinut atassuteqarluarnissaq, naalakkersuisoqatinnut uannullu allamik pingaarnerusoqanngilaq. Ministeriuneq Justin Trudeau qasseerpassuariarluni taama oqartareerpoq.

Canadamilu nunap inoqqaavisa naligiissumik ataatsimeeqatigisarnissaat taamaammat neriorsuutigaa, tamannalu maanna eqquutsillugu.

Inuit Tapiriit Kanatamip præsidentia Natan Obed, høvdingi Perry Bellegarde, The Assembly of First Nationsimik aamma aqutsisoq, kiisalu David Chartrand, Metis National Councilimik aqutsisoq, ministeriunermik Trudeaumik sisamanngornermi ataatsimeeqateqarput.

- Nunap inooqqaavinut saammaateqatigiinnissatsinnut akornatsinnillu pissutsinik nutarsaanissatsinnut pingaartumik ullumi alloriarpugut. Akornatsinni pissusissanik pisinnaatitaaffinnillu akuersaarnermik, ataqqinninnermik suleqatigiinninnermillu tunngaveqassapput, Trudeau oqarpoq.

Ukiuip ingerlanerani qanoq ineriartortoqarnersoq pillugu ukiut tamaasa ataatsimeeqatigiittarnissaq siuttut sisamat isumaqatigiissutigaat.

Tamatuma saniatigut nunap inooqqaavisa siuttui politikkit ataatsimoorussat pillugit ministerinik ukiumut marloriarlutik ataatsimeeqateqartalissapput.

Nuna tamakkerlugu saammaateqatigiinnissamik isumalioqatigiissitamik A National Council for Reconciliationimik taaguutilimmik pilersitsinissamut sulissuteqalernissaq siuttut sisamat isumaqatigiissutigaat.

Ilumoortussaq Saammaateqatigiinnissarlu pillugit Isumalioqatigiissitap innersuussutai 94-it qanoq piviusunngortinniarneqarnersut isumalioqatigiissitassap nakkutigissavai.

Inuit, indianerit metisillu siuttui Canadami ministeriunermik aatsaat taamatut ataatsimeeqateqarput.