Timmisartup nakkarnerani timmisartortartoq aquttarfimmut mattussaasoq
Timmisartup nakkarneranik misissueqqissaartut ilaat, Amerikamiut aviisiannut New York Timesimut taama oqarpoq.
Paasissutissat timmisartup karsiani qernertumi paasissutissanik oqaloqatigiinnernillu immiussaneersuupput.
- Tusaasinnaavat matu tukkarlugu ammarniarsarigaa. Aquttup aappaata aquttarfik sooq qimassimaneraa suli paasinngilarput. Paasinarsivorli timmisartup qaqqap innaanut apunngitsiarnerani aquttup aappaa aquttarfimmi kisimiissimasoq, matulu ammarsimanngikkaa, misissueqqissaartut ilaat oqarpoq.
Oqaloqatigiinnernit immiussat aquttup aappaata aquttarfimmiittup sulerisimaneranik imaluunniit iluaallersimaneranik paasissutissiinngillat.
Timmisartoq sinerissap qulaatiguulerlunilu appariartuleriasaarpoq. Appariartornerani minutsinik qulinik sivisutigisumi aquttarfiup mittarfeqarfiillu attaveqaqatigiinnerannik ajutuulerneranilluunniit paasissutissaqanngilaq.
Marlunngormat ullaap tungaani sila erseqqareqisoq timmisartup ajutoorneranut tunngasunik pisortatigoortumik suli paasissutissiisoqanngilaq. Timmisartumi Barcelonamit Düsseldorfiliartumi aquttut marluusut misilittagaqarluartuupput nalunaaquttallu akunnerini tuusintilinni timmisartumik ingerlatsisareersimallutik.