AWG2016 Timikkut ajoqusertarnerit akulikippallaarput
Naak kalaallit issittormiut unammiuaarneranni angusaqarluaraluartut, timertik ilungersortippallaarlugu ajoqusertarnerat akulikippallaarpoq. Tamannalu arnani timersortartuni takussaanerusoq, timimik sungiusaasup, Kenneth Stagep oqaatigaa:
- Unammiuaarneq ullut aappassaa ingerlanneqarpoq, ajoqusersimasullu takkutillattaalereerput. Tamanna ajuusaarnaqaaq.
Kalaallit timersortartut sulorarnermi, futsalimi nerrivimmilu arsaararnermi ulluni kingullerni ingerlalluarput.
Taamaakkaluartoq unammiuaannginnermi sakkortuumik sungiusapiloornerup kinguneranik unammiuaariat arlaqartut timertik ilungersortippallaarlugu ajoqusertut, timimik sungiusaasoq oqarpoq.
- Ajoqusernermi kingunerlutsitsineq soorunalimi pinaveersaartikkuminaattarpoq. Timertillu ilungersortippallaarlugu ajoqusertut arlaqarput, unammiuaarnerit aallartinngilaattaani sakkortuallaamik sungiusapiloortarmassuk, Kenneth Stage oqarpoq, nangillunilu:
Aamma atuaruk Kalaallit ataasiinnarmik ujaminnapput
- Kalaallit unammisartui qasujaakkaluarlutillu torralluinnartumik periaaseqaraluarlutik. Seeqqumikkut, nukimmikkut ujalumikkulluunniit akornuteqartarnerat ajuusaarnarpoq.
Timersortartullu taamaakulaleraluttuinnarnerat timimik sungiusaasup Kenneth Stagep 2015-imi Island Gamesertoqarneranili malugilereersimavaa. Ingammik kalaallit arnat arsaattartui timimikkut assigiinngitsunik ajoqusertarput.
Aamma atuaruk Arctic Winter Games angerlarsimaffinnit ima malinnaaffigisinnaavat
Unammersuarnissaq sioqqutingaatsiarlugu piareersarluartalerlutillu timikkut ajoqusernissaq pinaveersaartinniarlugu sungiusarluartalissasut, Kalaallit Nunaanni Timersoqatigiit Kattuffiat kajumissaavoq.
- Soorluuna unammersuaarnissaq sioqqulluarlugu sungiusarlualerneq ajortugut. Qaammatit pingasut sioqqullugit timeq aalatiliinnarnissaa naammanngilaq, sungiusartuaannartariaqarpummi. Tassa unammersuaarnerit naammassippata sungiusartarnerit ingerlaannaq aallarteqqinneqartassapput sakkortussusaalu qaffakkiartuaartillugu, Kalaallit Nunaanni Timersoqatigiit Kattuffianni generalsekretæri Carsten Olsen oqarpoq.
