Aalisartut umiarsuaatileqatigiillu appisaluutsittut
Aavaleraasartassiissutigineqartunit 85.000 tonsiusunit 35.000 tons sinnilaarlugit ukiormanna pisarineqarput.
Tamatumunngalu pissutaavoq aalisartut avaleraasartooqarfinnut katersuuttarnerat Tasiilamiit Nunap isuanut imaq tamaat aalisarfiginagu, aalisarnermut naalakkersuisoqarfik taama isornartorsiuteqarpoq.
Umiarsuutileqatigiit isornartorsiuneq akerlilerpaat innersuussutigalugulu, naalakkersuisoqarfiup nammineq kingusissukkut pisassiinermigut aammalu umiarsuit suminngaaneersuunissaannik sakkortuumik piumasaqaateqarnermigut aalisarneq sumiginnarsimagaa, aviisi Sermitsiaq taama allaaserisaqarpoq.
Aamma atuaruk Ukioq manna avaleraasartoortassat affaanngitsulluunniit pisarineqartut
Aalisarnermut Naalakkersuisoqarfimmi allaffimmi pisortap Jørgen Isak Olsenip erseqqissaatigaa, avaleraasartoorniarneq misileraalluni aalisarnerummat umiarsuaatileqatigiillu avaleraasartoorniarnertik Tasiilamiit Nunap isuanut tamaat annertusisariaqaraat.
- Kalaallit Nunaata soqutigisarai umiarsuaatileqatigiit Tunup sineriaa tamaat avaleraasartooqarneranik misissussagaat, tamatumani ilanngullugu Kujtaata Kitaa, Kalaallilli Nunaata soqutigisai umiarsuaatileqatigiit soqutigisaannut ataqatigiissimanngillat, Jørgen Isak Olsen aviisimi Sermitsiami apersorneqarluni taama oqarpoq.
Taama isornartorsiuteqarneq Royal Greenlandimit ilumuunnginnerarneqarpoq, annertuumilli akitsuuserneqarsimanerat ajornartorsiutaasoql Royal Greenlandimi suliniutinut ataqatigiissaarisoq Andrias Olsen oqarpoq.
- Aalisarneq aalisagaqarfiunerpaami ingerlanneqarsimagaluartoq aningaasaqarnermut tunngatillugu ataqatigiittoqanngitsoq Andrias Olsen oqarpoq.
- Isumaga naapertorlugu avaleraasartuunut akitsuut qaffasippallaaqaaq kalaallit aamma nunat allamiut umiarsuaataannut. - Eqqaamassavarput aalisarneq maanna ineriartortinneqaleruttormat, aalisarnerullu aalajaatsunngortinneqarnissaata tungaanut akitsuutit qaffasippallaartut aalisarneq unikaallatsinnaammassuk, Royal Royal Greenlandimi suliniutinut ataqatigiissaarisoq Andrias Olsen aviisimi Sermitsiami apersorneqarluni taama oqarpoq.
