Ukioq manna avaleraasartoortassat affaanngitsulluunniit pisarineqartut

Ukioq manna avaleraasartoortassat 85.000 tonsiugaluarput, avaleraasartoorniarnerulli naammassineqarnerani paasinarsivoq affaanngitsulluunniit pisarineqarsimasut. Aviisimi Sermitsiami ullumi saqqummersumi tamanna allaaserineqarpoq.

Avaleraasartuummi katillugit 35.410 tonsit pisarineqarsimapput, naak avaleraasartoortassat 85.000 tonsiugaluartut. Avaleraasartuut pisarineqarsimasut qanoq amerlatiginersut Sermitsiap Kalaallit Nunaanni Aalisarsinnaanermut Akuersissutinik Nakkutilliisoqarfimmit paasiniarsimavaa, kisitsisillu maanna saqqummiunneqarlutik.

Avaleraasartuut ukioq manna pisarineqartut siornamut naleqqiullugit amerlanerulaarput, 2014-imulli naleqqiukkaanni ikinnerungaatsiarlutik.

Avaleraasartuut pisarineqarsimasut ikinnerunerat pissutaalluni nunatta karsiata akitsuutinit isertitassai ilimagisamit ikinnerussasut Sermitsiap allaaseraa.

Avaleraasartuut ukioq manna pisarineqartunit akitsuutitigut isertitat 42,6 millionit koruunit missaanniinnissaat Sermitsiap kisitsisaataasa takutippaat.

Avaleraasartoortassiissutit aallaavigalugit akitsuutitigut isertitassatut naatsorsuutigineqartut 49 millionit koruunit missaanniikkaluarput, maannali 6 millionit koruunit missaannik ikinnerullutik.

Avaleraasartoortassat 85.000 tonsit tamakkerlugit pisarineqarsimasuuppata nunatta karsiata isertitai 117 millionit koruunit missaanniissagaluarput. Sermitsiaq taama allaaserisaqarpoq.