Misissuisoqarfik: Pineqaatissinneqartut nuutsitaanertik naammagittaalliuutigisinnaasariaqarpaat

Immikkut paarisassanngortitaallutik pineqaatissinneqartut, Nuummi pineqaatissinneqarsimasunut inissiisarfittaassami immikkoortortat ammasut matoqqasullu akornanni nuutsitaanermik naammagittaalliutiginissaanut periarfissaqartariaqarput. Inuttut pisinnaatitaaffiit pillugit Danmarkimi misissuisoqarfik taama isumaqarpoq.

Immikkut paarisassanngortitaalluni pineqaatissinneqartoq Nuummi pineqaatissinneqarsimasunut inissiisarfittaami immikkoortortat ammasut matoqqasullu akornanni nuutsitaanermi naammagittaalliutiginissaanut periarfissaqartariaqarpoq.

Inuttut pisinnaatitaaffiit pillugit Danmarkimi misissuisoqarfik tusarniaanermi akissuteqarluni Danmarkimi inatsisinik atortitsinermut ministereqarfimmut taama kaammattuuteqarpoq.

Pineqaatissinneqarsimasut arlallit pillagaanermik ingerlanerani immikkoortortamit matoqqasumit ammasumut nuutsinneqartarput, tassanilu inuiaqatigiinni ulluinnarni pissutsinut assingunerusunik atugassaqartinneqartarlutik.

Nuutsitaanerli tamatigut naatsorsuutigineqartut pineq-ajorpoq.

- Taava oqaraanni: ‘Iluatsinngitsoorpoq. Ammasumik atugassaqartitaallutit maaniiginnarsinnaanngilatit. Sillimaniarnermut tunngatillugu illersorneqarsinnaanngilaq. Immikkut paarisassanngortitaallutik  pineqaatissinneqarsimasunut immikkoortortamut utertittariaqarpatsigit, Inuttut pisinnaatitaaffiit pillugit misissuisoqarfimmi siunnersortaaneq Lise Garkier Henriksen taama oqarpoq, nangillunilu:

- Taamatut aalajangiisoqarnera sakkortuupilussuuvoq. Inuit sivisuupilussuarmik pillagassanngortinneqarsimasut pineqarsinnaapput, aamma immikkoortortami matoqqasumiinneq ammasumiinnerlu assigiinngitsupilussuusinnaapput. Taamaammat isumaqarpugut tamanna naammagittaalliutigineqarsinnaasariaqartoq.

Danmarkimi parnaarussivinniittut Pinerluttunik Isumaginnittoqarfiup nuutsitsinissamik aalajangiinera isumaqataaffiginngikkunikku naammagittaalliorsinnaatitaapput.

Lise Garkier Henriksenip KNR-imut erseqqissaatigaa kalaallit pineqaatissinneqarsimasut Kalaallit Nunaanni pillaatisiaminnik siunissami atuisalernissaat Inuttut pisinnaatitaaffiit pillugit misissuisoqarfiup ataatsimut isigalugu pitsaasutut isigigaa.

- Tamannalu ajortumik oqaaseqarfigineqarsinnaagunanngilarput. Pinerluuteqarsimasunut inissiisarfimmik Nuummi pilersitsinissamut alloriartoqarneratigut Kalaallit Nunaanni eqqartuussiveqarnermi eqqartuunneqartut tamarmik pillaatisiatik Nunaminni atorsinnaalissavaat.