Tiilerilaaq tikikkuminarsarneqalersoq
Tunumi Tiilerilaami nunaqarfik tikikkuminarsarneqarlerpoq.
Kommuneqarfik Sermersooq, Destination East Greenland, Visit Greenland Tiilerillaamilu najugalik takornarialerisartoq Gert Ignatiussen tamanna suleqatigiissutigilerpaat.
- Tiilerilaaq kusanartunngortinniarneqassaaq, aamma takujuminarsarneqassaaq. Tikittuninngaaniit nunaqarfik tamarmi nuannersoq, isikkorissoq qalipaatigissoq. Taanna siunertaavoq, taamaaliornikkut takornariat suli amerlanerusut maanngartalernissaat siunertarineqarmat, Tiilerilaami takornarialerisoq Gert Ignatiussen taama oqarpoq.
Tiilerilaap tikikkuminarsarneqarnissaanut suleqatigiit arlaqarput. Kommuneqarfik Sermersooq Tiilerilaami najugalinnut illuminnik qalipaarusuttunut qalipaatinik tunniussiumapput eqqagassallu piiarniarlugit. Destination East Greenland suleqataassaaq, Visit Greenland suleqataasussanut aamma ilaavoq.
Takornarialerisoq Gert Ignatiussen suleqatini peqatigalugit maannamut iliuuseqalereerpoq.
- Siunertaq saqqummiunneqartoq aallaavigalugu uagut piumasimavugut suleqataassalluta matuma siuarsarneqarnissanik. Taamaammat suleqatigiinnik pilersitsinermik aamma nammineq piumassuserput malillugu taamatut kissaateqarnikuuvugut, Gert Ignatiussen taama oqarpoq.
Najugallit tapersersuipput
Tiilerilaap tikikkuminarsarneqarnissaanut suleqataasut ilaat Visit Greenlandi ataatsimiinnerni peqataasareerput. Taakkulu aamma malugisaasa ilagaat nunaqarfimmiut soqutiginnillutillu ikiuukkusuttut.
- Inuit isumassarsialatsialattut isigaat, nunaqarfiup aningaasarsiornerunissaanut iluaqutaassammat taavalu nunaqarfik pitsaanerulissammat, Visit Greenlandimi pisortaq Anders Stenbakken oqarpoq.
Taassuma ilanngullugu oqaatigaa taamak iliuuseqarneq nunarfimmiunut siunissami takornarianullu iluaqutitaqarumaartoq.
- Nunaqarfimmut nuanniinnarani pinniinnaranilu aamma saligaallisagaasumut, illui qalipassimasunut illusimaffigineqarsinnaasunillu illulimmut tikissapput. Tassalu pinngortitamik angisoorsuarmik misigisaqassapput kulturiannillu takullutik, Anders Stenbakken oqarpoq.