VIDEO Tasiilamiunut inussiarnersunut tikeraarneq

Ilinniartitsisoq inuusuttoq, Tinka Magnussen, ukiuni qulingiluani Nuummi najugaqareerluni illoqarfimmut meeraaffigisaminut siorna uterpoq, Tasiilamiullu allat assingalugit nunatta sinneranut peqataanngitsutut misigisarpoq.

- Kommuneqarfik Sermersuup ataaniippugut. Ilaavugut, imaluunniit ilaanngilagut. Ilaannikkut allaaneq-ajorpoq immikkoortugut, Tinka Magnussen KNR-imut taama oqarpoq.

Tusatsiakkat ilumoortortaqanngillat

Tasiilaq Illoqqortoormiullu pillugit, assersuutigalugu Qanoruumi, nutaarsiassanik ilanngutassiortoqartarnissaa amigaatigaa, ilaatigut kitaamiut tikittut Tunu pillugu tusatsiagaasa eqqortuunngerinik sammisaqarfiusunik, ilinniartitsisoq oqaluttuartoq.

- Tunu pillugu nuanninngitsorpassuarnik tugasaqarsimallutik oqaatigisarpaat. Erserpasillutik tamaanga tikittarput. Eqqarsartarput, iluameerpat taakkua. Kisianni tusartakkatik eqqortuunngitsut paasisarpaat, Tinka Magnussen oqarpoq, tunumiullu pillugit tusartuagarput, tassalu inussiarnersuullutillu tikikkuminartuunerat ilumoornerarlugu.

Tasiilaq immikkut sammissavarput, ilaatigut imigassamik ajornartorsiuteqarneq aamma meeqqat Danmarkimit tikeraartut 25-it sammineqassallutik.