Tapiitsoq ACR-imut peqataasoq nersornaasiuttakkamut innersuunneqartoq
Taamatullu angusaqarnera ima alutorsaatigineqartigaaq Arne Christensenip Sisimiuni ujakkaarluni sukkaniunnermut peqataanera Danmarkimi Kultureqarnermut ministereqarfiup Innarluutilinnut timersortartunut nersornaasiuttagaanut 100.000 koruuninik aningaasartaqartumut maanna innersuunneqarluni.
Danmarkimi kultureqarnermut ministereqarfik tusagassiorfinnut nalunaaruteqarluni taama allappoq.
Aamma atuaruk Tappiitsoq ujakkaarluni allanut maligassiuerusuttoq
- Arne Christensen Kalaallit Nunaanni Arctic Circle Racemi peqataanermini takutitsilluarnini pillugu Innarluutillit timersortarnerat pillugu ilisimasaqarfimmit nersornaasiuttakkamut innersuunneqarpoq. Arctic Circle Race, sisoraatinik sukkaniunnerit silarsuarmi sakkortunerpaat ilagisaat kilometerinik 160-inik isorartutigisumut sukkaniunneruvoq, ministeriaqarfik tusagassiorfinnut nalunaarutimini taama allaaserisaqarpoq.
Arctic Circle Race Sisimiut eqqaanni kilometerinut 160-inut sukkaniunnerusoq ukioq manna apriilip qaammataani 20-ssaannik ingerlanneqarpoq.
Aamma atuaruk Sisorartartoq tappiitsoq Arctic Circle Racemut peqataalersoq
Arne Christensen ullut pingasut ingerlanerini nalunaaquttap-akunneri 22-t sinnerlugit ingerlaareerluni apuukkami qiimmattartunit ilassineqarpoq.
Unammeqataasut 60-it sinnerlugit ukiullit akornanni siuttuuvoq peqataasullu katillugit 159-iusut akornanni normu 110-nngorluni.
Nersornaasiuttagaq 100.000 koruuninik aningaasartaqartoq innarluutilimmut innarluutillit timersortartarnerannik siuarsaanermut ineriartortitsinermulluunniit immikkut ittumik iliuuseqarsimasumut tunniunneqartarpoq.
