Tappiitsoq ujakkaarluni allanut maligassiuerusuttoq
Qallunaaq Arne Christensen tappiitsuvoq ujakkaarnermillu nuannarisaqartuulluni. Timersortartut timimikkut innarluutillit unammiuaarneri ukiut 20-it matuma siorna peqataaffigai, Arctic Circle Racelu sivisuumik peqataaffigerusussimallugulu.
62-nik ukioqalersimagaluarluni peqataasunngorpoq - imminuinnarli pilluni peqataanngilaq innarluuteqartunut periarfissanik aqqutissiuerusulluni aamma peqataavoq.
- Killissanik qaangiisarneq ingerlatiinnarusuppara, tamanullu takutillugu tappiitsuugaluarluni aallutaqartoqarsinnaasoq peqataasoqarsinnaalluni. Arctic Circle Racemullu, nunarsuarmi sisorarnerit sakkortunersaannut, tappiitsuugaluarlunga peqataanikkut tamanna anguneqarsinnaasoq tamanut takutikkusuppara.
Aamma atuaruk ASSIT Arctic Circle Race tallimanngorpat aallartissaaq
- Immini anguniagassaavoq, naammassiniarnissaalu uannut, inuttut timersornikkullu, anguniagassaangaatsiarpoq, Arne Chirstensen, Arctic Circle Racep Facebookimi quppernerani taama oqarpoq.
Ujakkaarnermik nuannarisallip ujakkaarnermik sungiusaat atorlugu naqqup iluani sungiusarnerusarpoq. Juullip kingorna katillugit sapaatit-akunneri tallimat sisorarnermut atorsimavai. Taamaammat piareersarluarsimasutut misigisimavoq.
Aamma atuaruk Frederik, Piitannguaq Linnet, Arctic Circle Racemi peqataassapput
Aamma atuaruk VIDEO Kunngissaq Frederik ACR-imut Nuummi sungiusarpoq
Marlunnik ingerlaqateqassaaq - Henrik Seidelin Lars Røpkelu. Mikrofoni højttalerilu Arne Christensenip qitianut ikkunneqarsimasoq atorlugit ingerlaarfik pillugu ilitsersortassavaat. Arne Christensenillu ingerlaqatissaata ilisarisimalluaramikku qattunikkut ammut nammineerluni sisusinnaassanersoq nalilersorsinnaassavaat. Taamaanngippat sisoraatit peeriarlugit pisuinnartassapput.
Angutip sapiitsup Arctic Circle Racep Facebookimi quppernerani apersorneqarnera tamaat uani takuuk.
Arctic Circle Racemut peqataasut 210-t missaanniittut kilometerinik 160-inik - ilaasalu kilometerinik 100-nik - ingerlaarnerat ullumi tallimanngornermi apriilip aallaqqaataani nalunaaqutaq qulinut aallartissaaq.
