Tamat oqartussaaqatanerat ajornartorsiorpoq
Tamanna Folketingimut kingullermik qinersinermi qinersisinnaasut affaat inulaarlugit taasisimanerisa takutikkaat, inuiaqatigiilerineq pillugu ilisimatooq, Birger Poppel naliliivoq.
- Qinersinermi qinersisinnaasut affaat inorlaarlugit taasiartorsimanerisa oqartussaaqataaneq nakkaativissimasutut oqaatigineqarsinnaavoq, tamannalu ajornartorsiutaavoq.
Ilisimatusarfimmi inuiaqatigiilerineq pillugu aamma ilinniartitsisoq, Birger Poppel oqarpoq.
1990-imi Folketingimut qinersineq eqqaassanngikkaanni, ukioq manna qinersinermi taasiartortut aatsaat taama ikitsigaat.
Taama ikitsigisut qinersisimanerannut politiikerinik qattussisoqarnera, Inuit Ataqatigiit siulittaasuata, Sara Olsvigip pissutaatikkaa, Birger Poppel allatut isumaqarpoq.
Taanna oqarpoq, Folketingimi ilaasortaatitaqartarneq Nunatsinnut annertunerusumik iluaqutaanngitsutut politikerinit qangali oqaatigineqartartoq ilaatigut pissutigalugu, Folketingimut qinersinissaq inuiaqatigiit ilaannit soqutigineerussimasoq.
Aamma atuaruk Ukiuni kingullerni 25-ni folketingemut qinersisarnermi aatsaat taama ikitsigisut qinersiartorput
Politikkikkut oqallisigineqartartunut inuiaqatigiit peqataatinneqartannginnerat Inatsisartunut, Folketingimut kommunalbestyrelsimullu qinersinerni taasiartortartut, nunanut allanut naleqqiullugit, ikinnerulersimanerannut tamanna aamma pissutaaqataasoq, Birger Poppel oqarpoq.
Ilaatigut aatsitassarsiornermut apeqqutit pineqartillugit, inuiaqatigiit qarsupiinnartarneqarnermik misigitinneqartartut Birger Poppel aamma oqarpoq assersuutigalugulu, inuiaqatigiit pappilissami allassimasumi taamaallaat peqataatinneqartarnissaat peqqusutaasoq.
Peqataatitsisannginneq sakkortusineqarpoq, politikerit suliatik pillugit naammaginartumik inuiaqatigiinnut paasissutissiineq ajormata - naak tamanna inuiaqatigiinnit kissaatigineqaraluartoq, Birger Poppel oqarpoq.
Tamakkulu ilaatigut pissutaaqattaallutik, inuiaqatigiit amerlasuut qinersinissaminnik soqutigisaarussimasut, Poppel oqarpoq. Taamaattoqarneranilu inuiaqatigiit ataqatigiinnerannut tamanna akornusiisartoq, Birger Poppel oqarpoq.
- Inuiaqatigiit akornanni isumaqartoqarpat qinersisarnerit pingaaruteqanngitsut, taava aalajangiisartut inuillu qarsupinneqaannartartutut misigisimasut akornanni avissaartuunneq annertusisussaavoq. Tamannalu qaangerneqassappat, inuit oqartussaaqataanerat piviusoq avissaartuuffiunngitsorlu anguniarneqartariaqarpoq.
Inuiaqatigiilerineq pillugu ilisimatooq, Birger Poppel naliliivoq.
Taanna aamma oqarpoq, oqartussaaqataaneq avissaartuuffiunngitsoq pilersinneqassappat taava inuusuttut inuit ataasiakkaat oqartussaaqataaneri pillugit ilinniartitaasarnissaat anguniarneqartariaqartoq.
Aamma tusagassiorfiit aningaasatigut pitsaanerusumik atugassaqartilernerisigut Inatsisartut ataatsimiinneri pitsaanerusumik tamanut siammarterneqartartussaassasut, Birger Poppel isumaqarpoq.
