Takornariartaatini ilaasunut akitsuut borgmesterip naammaginngilaa
Assigiinnik kavasserlutik kamippassualerlutik assiliisaqattaarujuutaa aqqusinerni angalaarusaartarput, maannalu umiarsuarnut takornariutinut ilaallutik tikerallataaqqilerput.
Umiarsuit tikittut aatsaat taama amerlatigalutik ukioq kingulleq 480-it illoqarfinnut tulapput. Taamaammallu taakku kommunimit aningaasarsiutigineqarnissaanut anguniarlugu Avannaata Kommuniani borgmesteri Palle Jeremiassen (attaviitsoq) suliniutinik ujartuivoq.
Takornariat avalaqqinnginnerminni akunnialuinnarni nunamiittarput. Illoqarfiillu takornariarneqarnerpaat ilaanni Ilulissani borgmesterip, tikeraarpassuit kommunimit aningaasarsiuutigineqarnerunissaat kissaatigaa.
Palle Jeremiassen borgemestereqataalu maanna aningaasarsiorsinnaalerput. Ukiummi nikinnerani ilaasunut akitsuut nutaaq atuutilersinneqarpoq, taamaammallu umiarsuarnik takornariartaatiniik ilaasut tamarmik immikkut nunamut tulannermi inummut ataatsimut 50 koruuneertalissapput.
Taannali naammanngitsoq borgmesteri isumaqarpoq.
- Isumalluarnerusinnaangaluarpunga, taanna oqarpoq.
Umiarsuit takornariartaatit tikinneranni ilaasumut ataatsimut kommunimut akitsuut 150 koruuniussasoq taassuma siorna siunnersuutigaluarpaa.
- Annertunerugaluarpat uagut taanna piumanikuugatsigu. Kisianni aallarniutitut isigivarput aamma qujanaqaaq taamatut akitsuusiisalerneq aallartimmat.
17 millionit koruunit nunatta karsianut
Ilaasumut akitsuut nutaaq 17 millionit koruuninik nunatta karsianut iluanaarutaassasoq, umiarsuit takornariartaatit ukioq manna tikittussat Visit Greenlandip nalunaarsugai aallaavigalugit KNR-ip naatsorsuinerata takutippaa.
Kommunit aamma qilanaarutissaqarput, taakkumi 18 millionit koruuninit amerlanerunerusut avatangiisinut aserfallaatsaaliuinermullu akitsuutissat takornariaqarnermut iluaqutigilissavaat.
Avannaata Kommunia umiarsuarnik takornariartaatinut ilaasunit takornarianit katillugit 43.361-nit ukioq manna tikinneqassasoq naatsorsuutigineqarpoq.
Inuppassuit silagissiorlutik nuannaarlutillu takornariarnissamik saniatigut aamma piumaqartartut Palle Jeremiassen oqarpoq:
- Anartarfinnut tunngasut ikaartarfinnut tunngasut avatangiisinut pitsaanerusumik atugassaqartinneqarnissaminnik piumasaqartarput, taakkualu akitsuuteqartinnagu uagut missingersuutitsinniit matuniartartussaavagut aningaasanik arlaannik umiarsuarsuit isertitsissutiginnginnatsigit.
Aningaasat sumiiffinni atugassat
Avannaata Kommunianut ilaasunit akitsuummiit 2,1 millionit koruunit ukioq manna isertinneqassasut naatsorsuutaavoq. Aningaasallu isertinneqartut avatangiisinut aserfallatsaaliuinermullu atugassiaasut kommuniminni namminneerlutik aaqqiissuutigissavaat. Aningaasalli sumiiffimmi iluanaarutaassutaaffigisaanni atorneqartassasut Palle Jeremiassen isumaqarpoq:
- Uanga isumanga uaniippoq Ilimananut talissimangunik Ilimanamut aningaasat taava nakkassapput, Tasiusamut talissimangunik Tasiusamut taakku aningaasat nakkassapput, kisianni taanna kommunalbestyrelsep aalajangigassarivaa qanoq atorneqassanersut.
Umiarsuarnik takornariartaatinut takornariat 19.000-it sinnilaarlugit Avannaata Kommunianut siorna takornariarsimapput.