Taaseqatigiittarnissamik isumaqatigiissuteqarneq pissutigalugu Aleqap ilaasortaaffini pigiinnassagai
Aleqa Hammondip Siumumit anisitaanini, taamalu Socialdemokratit ilaasortaatitaasa akornanniikkunnaarnini pissutigalugu Folketingip Kalaallit Nunaannut tunngasunut ataatsimiititaliaani siulittaasup tulliatut inissisimaannarnissaa apeqquserneqarpoq.
Taaseqatigiittarnissarli pillugu Aleqa Hammondip Folketingimi ataatsimiititaliani assigiinngitsuni atuuffini tigummiinnassavai.
Socialdemokratit Folketingimi ilaasortaatitaasa siulittaasuat KNR-mut taama ilisimatitsivoq.
- Aleqa Hammondip Siumumi ilaasortaajunnaarnerminut, taamalu Socialdemokratit ilaasortaatitaasa akornanni ilaasortaajunnaarnerminut atatillugu oqaatigaa taaseqatigiittarnissamut isumaqatigiissusiorsimalluni. Folketingip Kalaallit Nunaannut tunngasunut ataatsimiititaliaani siulittaasup tulliatut inissisimanini taamaammat tigummiinnassavaa, Nunallu Avannarliit Siunnersuisoqatigiiffianni sinniisussatut inissisimanini tigummiinnassallugu. Ataatsimiititaliani allani ilaasortaajunnaassaaq, Socialdemokratit Folketingimi ilaasortaatitaasa siulittaasuat Henrik Sass Larsenip KNR-imut taama oqarpoq.
Taaseqatigiittarnissamik isumaqatigiissuteqarneq
Folketingimi ataatsimiititaliani inissat agguarneqartussanngoraangata, tamanna partiit taaseqatigiittarnissamik isumaqatigiissutigisimasaat tunngavigalugu ilaatigut pisarpoq.
Ataatsimiititaliani assigiinngitsuni inissat partiit angissusaat tunngavigalugit agguataarneqartarput. Ilaasortat qulit inissamik ataatsimik pissarsissutaasarput. Ilaasortallu 20 inissanik marlunnik pissarsissutaasarlutik il.il..
Najoqqutarisaq: Folketingip nittartagaa
