TAAK politikerinut ikioqquvoq: Aningaasassaaleqivugut

Arnat assammik arsarlutik nunanut allanut unammisartut ukiup affaata matuma siorna Stavangerimut VM-eriarnerat nuannarineqaqaluni nunatsinniit malinnaavigineqarluarpoq. 

Nuannaterujussuarnerup kingorna akiligassaq takkuttarmat pissutsit maanna allarluinnaapput, nuannaartoqanngivippoq. 

- Aningaasarliorpugut aningaasat amigaatigaagut. Carsten Olsen, Timersoqatigiiffiit Assammik Arsartartut Kattuffiani siulittaasoq taama oqarpoq. 

Qisuariartoqarnissaa neriuutigaa

Aningaasassaaleqineq sungiusaasut ingerlalluartut marluk, tassa nunanut allanut sungiusaasup Anders Friisip aamma ikiortaata Kim Ostermann Petersenip marsip 26-ani soraarsitaaneranik kinguneqarpoq. 

Kattuffiup pikkorivissunut immikkoortortaani aningaasarliornerup kingunerisaanik soraarsitsisoqarpoq, tamannalu ungasinnerusumut pilersaarniarnermut kipiluttunartorsiortitsivoq. Arnallu assammik arsartartut piffissami qaninnermi pilersaaruteqarfigineqanngimmata taakku sipaarniarfigineqarnissaat kattuffiup aalajangiuppaa. 

- Soraarsitsinerup kingorna politikerit ima oqarnissaat kissaatigigaluarparput: "Shit, pisooqataaffigigunakkatsinnik pisoqarunarpoq", siulittaasoq oqarpoq. 

Maannamulli suli taama oqartoqanngilaq. 

Arnat nunanut allanut unammisartut Stavangerimi VM-ertoqarnerani nuannaarutigineqaqisumik peqataanerannit, pissutsit maannamut allarluinnanngorsimapput. 

Stavangeriliarneq nuannivissoq

Stavangerimi VM-ertoqarnerani peqataaneq assammik arsartartunit, ilaqutaannit nunatsinnilumi innuttaasunit kisimi nuannaarutaanngilaq, politikerimmi arlallit nuannattunut akuunerat KNR-imit oqaluttuarereerparput. 

Angalaneq katillugu 210.000 koruuneqarpoq, taakkunanngalu 157.332 koruunit timersornermut naalakkersuisumit Aqqaluaq B. Egedemit taassumalu naalakkersuisoqarfiant atorneqarput. 

- Aqqaluaq B. Egedep angalernut aningaasartuutai qiviaaraanni tissinaannarporluunniit, Carsten Olsen oqarpoq. 

Carsten Olsen isumaqarpoq Aqqaluaq B. Egedep Stavangerimi peqataanera pissusissamisoortoq, angalenerulli akisunerujussua eqqarsarnartoqartippaa. 

Nuannannersuarmut aningaasartuutit timersoqatigiiffiit kattuffiisa iluaqutigisimasinnaagaluarpaat, annertuumik kinguneqartussamik aningaasaliisoqassappat amerlanerit pisariaqartinneqaraluartut. 

- Millionilikkaat timersornermut atorneqartussaagaluit eqqartorneqarput. Aningaasamininnguit naammanngillat. pikkorivissunik ineriartortitsineq annertuumik aningaasaliivigineqartariaqarpoq. Assammik arsartartut kisimik pisiariaqartitsinngillat, taanna oqarpoq. 

Anigaasarliorneq 

Timersorneq ajunnginnerpaamik inerisarneqassappat, assammik arsartartut pikkorivissut Naalakkersuisunit tapersersorneqarnerusariaqarput. 

- Politikerit tapersersuisariaqarput, akisussaaffeqarnerpaat tapersuisariaqarput. Kattuffitsinni timersornermik inuuniutilittulli pissuseqarluta sulisinnaalissagutta, taava Aqqaluaq B. Egede taamaaliornissatsinnut ajunnginnerpaamik aqqutissiuilluni suliniuteqarnermik aallartitsisariaqalerpoq, Carsten Olsen oqarpoq. 

Nunatsinni timersortartut pikkorivissut atugaasa pitsanngorsarneqarnissaat siulittaasup kissaatigaa, pingaarutilittulli isigineqalernissaannut aningaasat amigaatigineqartut ataatsimut isigalugu amerlavallaarput. 

- Assammik arsarneq ineriartortinniarlugu kajumissutitsinnik sulivugut, iliuuuseqartoqanngippalli ineriartortitsineq ajornakusoorpoq, taanna oqarpoq. 

Assammik arsartartut kattuffiani sulineq kajumissutsimik sulinermik ingerlanneqarpoq, kattuffiulli suliniuterpassui akissaqartinneqanngillat, piviusunngortinnissaannut atorfeqartoqarnissaa kattuffimmit pisariaqartinneqarmat. 

- Piginnaasanik ineriartortitsineq, saqqumilaarneq attaveqaqatigiinnerlu ineriartortikkusukkaluarpagut. Pilersaarusiorneq aamma assammik arsarnermut pikkorissaanerit. Angorusutagut inuiaqatigiinnut annertuumik iluaqutaasussat amerlagaluaqaat, Carsten Olsen oqarpoq. 

Nunatsinni timersornermut kattuffinni arlalinni anigaasarliortoqarnera, sungiusaasunik soraarsitsinerup kingorna, politikerinit paasineqarnissaa siulittaasup kissaatigaa. 

- Uittoqartariaqarpoq, taamaaliunngikkunimmi issiavinni taakkunani akissarsiutigalugu issianissaminnut tulluanngillat, siulittaasoq oqarpoq.