Suliffeqarfinnik aallarnisaasoq Povl Brandt toqukkut qimaguppoq

Suliffeqarfiutilik suliffeqarfinnillu aallarnisaasoq 85-inik ukioqartoq Povl Brandt toqukkut qimaguppoq. Sulisitsisut Peqatigiiffiata pisortaa Brian Buus Pedersen tusagassiuutinut taama nalunaarpoq.
Allattoq Anton Gundersen Lihn, Sara K. Jakobsen
novembarip 30-at 2017 15:36

Povl Brandt Roskildip eqqaani Himmelevimi utoqqqaat angerlarsimaffianni toqunissani tikillugu najugaqarpoq.

Brandti qarmaasutut ilinniagaqarluni Nuummut 1950-ikkunni nuuppoq, Betoncentralimillu kingornatigut piginnittuulerluni.

Taassuma saniatigut kilisaataateqarfik Qajaq-Trawl pilersitseqataaffigaa.

Nutaanik aallartitsiumatuup Povl Brandtip arnaq asannilerfigisani, Augusta Grethe Kristiane Johnsen, katippaa.

Aappariit taakku aningaasaateqarfimmik 16 millionit koruuninik imaqartumik pilersitsipput. 

Aningaasaateqarfik Kalaallit Nunaannit ilinniariartortunut ilinniartunullu Kalaallit Nunaannut attuumassuteqartunut atuuffeqarpoq.  

- Ilinniarluarsimasut ilinniaqqissimasullu amerlanerit pisariaqartippagut, aningaasaateqarfippullu anguniakkamik iluaqusiisinnaappat, nuannaarutigalugu naammagisimaassaqaarput, Povl Brandt 2016-imi oqarpoq. 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq