Suliffeqarfiit US Air Forcemut kiffartuussinissamut isumaqatigiissut pillugu maalaarput
- Suliffeqarfiup sulisussarsiarineqartup isumarput malillugu piumasaqaataasut naammassisimanngimmagit naammagittaalliorniarluta aalajangersimavugut.
Greenland Contractorsini pisortaaneq Peter Kofoed oqarpoq. Suliffeqarfik Pituffimmik maannakkut sullisinissamik isumaqatigiissuteqartoq, amerikami sakkutuunut timmisartortartunut naammagittaalliummik nassitsisimavoq.
Qallunaat suliffeqarfiutaat Copenhagen Arctic aamma sullissinissamut neqerooruteqarsimasoq aamma naammagittaalliorsimavoq.
Isumaqatigiissummut atuuttumut akerliuvoq
Suliffeqarfiimmi aalajangiusimavaat, suliffeqarfiup Exelis Servicep toqqarneqarnera USAp Danmarkillu illersornissamut isumaqatigiissutaannut atuuttumut akerliusoq.
Exelis Service Danmarkimi angerlarsimaffeqarluni qallunaat suliffeqarfiisa allattorsimaffianni nalunaarsorneqarsimagaluarpoq. Tassalu pappialatigut qallunaat suliffeqarfigalugu CBS-imi professorip Søren Friis Hansenip erseqqissarpaa.
- Siullertut suliffeqqarfik qallunaat allattorsimaffianniittariaqarpoq, tassa Danmarkimi, Kalaallit Nunaanni Savalimmiuniluunniit. Piumasaqaat taanna naammassineqarsimavoq. Taava suliffeqarfiup Danmarkimiinnini allattorsimaffimmut nalunaarutigissavaa, qallunaatummi adresseqarami.
Exelis Service qallunaat nunaanniikkaluarluni amerikamiut suliffeqarfiutigaat
Sulisussarsiuinermili aamma erserpoq suliffeqarfik nunat allamiut pigisaannut immikkoortortaassanngitsoq. Taamaattumik Exelis Service qallunaatut nalunaarsorneqarsimagaluarluni amerikamiut Vectrusip suliffiutigaa.
Copenhagen Bussines Schoolimi professori Søren Friis Hansen nassuiaavoq isumaqatigiinngissut tassaniittoq.
- Danmarkimi suliffeqarfinnut immikkoortortaanersut nalunaarsorneqartanngillat. Taamaattumik una pillugu oqarsinnaavugut suliffeqarfiup piumasaqaat naammassisimagaa. Siunertaali eqqarsaatigalugu ilimanarneruvoq, suliffeqarfik neqerooruteqartoq suliffeqarfimmit nunani allamiumit aqunneqassanngitsoq.
Amerikamiut sakkutuut timmisartortartut maanna periarfissaqarput ulluni 100-ni suliamik nalilersuissallutik.
