Sermersooq: Suli unamminartoqarpoq
Kukkunersiusarfik Deloitte naatsorsuutit kukkunersiorneqarnerannit nalunaarusiamini arfineq-pingasunik kukkunersiuisutut oqaaseqaateqarpoq. Siorna aamma taama amerlassuseqarput, kommunillu pisortaanerigallagaata borgmesterillu tamanna uggoraat.
- Ukiuni kingullerni siuariartoqarsimaqaaq, utaqqisinnaasimanngilangali, tamaattumillu qullersat ukioq manna oqaaseqaataasunut kingullernut akiitsunut akiliinissamut pilersaarummik saqqummiusseqqusimavakka, borgmester Asii Chemnitz Narup tusagassiorfinnut nalunaarummi taama oqarpoq.
Kukkunersiortut isornartorsiugaasa ilagaat aqutsisunit nakkutigineqanngippallaarneq akissarsialerivimmilu naatsorsuinermi ingerlanerliorneq.
AAMMA ATUARUK Mittarfimmut aqqusinniornermut 103 millionit Sermersuup aningaasartuutiginiaraa
Kommuneqarfik Sermersuup 2016-imut ukiumoortumik naatsorsuutai 20 millionit koruuninik sinneqartooruteqarfiupput, taakkulu missingersuutigisanit 6 millionit koruuninik ikinnerupput.
Kommunip pisortaanerigallagaa Lars Møller-Sørensen naapertorlugu, aningaasartuutini ataasiakkaani nikerarnerit pisimapput, ilaatigut sanaartornermut aamma isumaginninnermi meeqqanik sullissinnermut aningaasartuutigineqartut amerlanerusimallutik. Suliffeqarnermulli tunngatillugu aningaasat ikinnerusut atorneqarsimapput.
Kukkunersiuisut nalunaarutaat uani atuarneqarsinnaavoq.
