Suleqatigiinnikkut ajornartorsiuteqarsimaneragaaneq Agner Markip ilisarinngilaa
KNR-imili apersorneqartilluni isumaqatigaa TELEPOSTimi sullivimmi atukkat sakkortusinnaasarmata.
- Ilisarisinnaavara suliassaqartarmat angumerinngitsuukkatsinnik. Tassanngaanniilli uannut allakkanni allassimasannitut suleqatigiinnermi ajornartorsiuteqarsimasoq ilisarisinnaanngilara.
Agner Mark taama akissuteqarpoq aperiganni, tunngavilersuutit ilisarisinnaanerai pisortaagallartut marluk Steen Montgommery-Andersen aamma Per Svendsen TELEPOSTimi attaveqaqatigiinnermut pisortaq Ivalo Egede aqqutigalugu aprilimi ukioq manna tunuarniuteqarnerminni tusagassiiuutinut nassiussaminni aallassimasaat.
Aamma atuaruk Tele-Postimit tunuarniartut pillugit oqaaseqarusuttoqanngilaq
KNR-imut attaveqaqatigiinnermut pisortap mailimi allakkamini taakku marluk pisortaagallarnerminniit tunuartut allaaserai, pissutigalugu tamanut naammaginartumik siulersuisut iluamik suleqatigilersinnaannginnamikkit.
Taannattaaq Agner Markip ilisarisinnaanngilaa.
- Uanga taama oqaasertaliinngilanga, aamma taamatut uannut saqquumisoqanngilaq. Aamma tamanna pillugu Steen Montgommery-Andersen oqaloqatigereerpara. Taamaammat taama oqarneq nassuiarsinnaanngilara, uannut saqqummiunneqarnikuunngimmat, Agner Mark oqarpoq.
Aamma atuaruk Tele-Postimi aqutsisut allanik taaguutitaartut
Aatsaallu tusagassiuutini sammineqalinngilaq siulersuisut aqutsisullu akornanni ajornartorsiuteqarnera.
Michael Binzer nittartakkami isummersortarfimmini allannikuuvoq ajorluinnartumik siulersuisut siulittaasualu suleqatigiissimanertik pillugu.
Siulersuisut siulittaasuata tullianut siorna septembarimi allakkaminni TELEPOSTimi aqutsisut arlaqartut allapput toqqissisimanarinagu siulersuisut siulittaasuata pisortanngortussallu akornanni sivisuumik ajunngitsumik suleqatigiittoqarsinnaassanersoq nalornissutigigamikku.
TELEPOSTimilu siulersuisut aqutsisullu akornanni suleqatigiinnikkut ajornartorsiuteqartoqarsimaneragaanera akuerinngilluinnarpaa.
Aamma atuaruk TELE-POST-imi aqutsisut siulersuisullu suleqatigiinniarnikkut uteqqiattumik ajornartorsiortarsimasut
Isumaqatigaali sullivimmi sivisuumik atukkat sakkortusimammata, piumasaqaatit nutaat pilersaarutillu angusaqarluarniartut angumeriniarlugit sulinermi.
Assersuutitullu taallugu TELEPOST maannakkut pingasunik annertuunik suliniuteqarmat. Kabeli immap naqqatigoortoq- radiokædelu avannaani inerisaavigineqarput, IT-systemet suliffeqarfiup pigisai tamarmik taarsersorneqarput, ilutigitillugulu Namminersorlutik Oqartussat namminersortunngorsaanermik piumasaqaateqarlutik.
- Angumersiniaalluni ulapikkaanni aporfissaqariataartarpoq, soorlu namminersortunngorsaanermi taamaaliorsimasugut.
