Qaanaami assilissanik seqertitanik takutitsineq
Takutitsineq Norgemi Islandimilu ingerlanneqareerpoq, Nuummilu Katuap saavani kingullermik takutitsisoqarluni. Assilissat seqertittaganngorlugit sananeqartut, Qaanaami meeqqat atuarfianneersut eqqumiitsuliortoqatigiit Tura Ya Moya-kkunneersoq Karen Thastum peqatigalugu suliaraat.
Angalanermi assilisat ilaatigut aamma takutinneqassapput. Atuarfimmi pisortap Dan Normanip Qaanaami assilisai
ilanngullugit aamma takutinneqassapput. Sammisaq tassaavoq sumiiffiup anersaava. Eqqumiitsuliortut nipilersortartullu assigiinngitsut takutitsinermi peqataatinneqarnissaat aamma pilersaarutaavoq.
Saqqummersitsineq Qaanaap katersortarfiata saavani pingasunngorpat unnukkut pissaaq. Silalu ajunngeriarpat iluliarsuit ullukkut seqertittanik aamma qinngorfigineqassapput. Atuartut eqqumiitsuliaat immikkut takutinneqarumaarput. Qaqortumi assilisanik seqertitanik tulliani takutitsisoqassaaq Aarhusillu kulturikkut pikialaartitsinermi Europami ukioq manna illoqarfinni pingaarnersaattut toqqarneqarnerani aamma takutitsisoqassalluni.
