Spilli kalaallisut oqaasertalik facebookimi saqqummerpoq
Doggieblues facebookimi spillerneqarsinnaavoq, Android-telefonini assigisaanilu aaneqarsinnaalluni, kalaallisullu oqaasertalerneqarsinnaalluni. Spillimi qimmeq aqutassaavoq, qimmillu suliassaraa savanik katersinissaq, aqqutaanilu assigiinngitsunik unammillernartoqarpoq.
Doggieblues kalaallit oqaasertaqarnera alutornarluinnarpoq, tusaannarnagulu misilittariaqarluni. Oqaasertai quujanangajassinnaapput, soorlu spillimi qimmit sakkuisa ilaat anaq atomiusoq.
Spilli IceMedia Aps´imi Johannes Müllerimit kalaallisuunngortinneqarpoq, KNI Pilersuisoq aningaasaliisoralugu.
Spillimik sanasup maanna Doggiebluesip malitsissaa suliarileruttorpaa. Aammagooq taassuma kalaallisut oqaasertalernissaa sulissutiginiarpaa.
- Siunissami spilliliakka kalaallisut oqaasertalertarniarpakka. Oqartoqarsinnaavoq nunatsinni taamatut spilliliorneq imminut akilersinnaanngitsoq, atuisut ikippallaarmata. Taamaakkaluartoq nunatsinnit ikikkaluanik atuisoqarnissaa qisuariartoqarnissaalu nunanit allanit atuisoqarnissamit orniginartinneruara, Sisimiunimi peroriartornikuugama, Kununguak Iversen KNR.gl´imut oqarpoq.
