Spaniami pisuinnarnik saassusseqqittoqarnerani inuit tallimat politiinit toqutaasut
Spaniami politiit illoqarfimmi Cambrilsimi "peqqarniisaarniaasorineqartut" tallimat sisamanngornerup unnuaani aallaallugit toquppaat.
Politiit Twitterikkut taama allapput.
Toqutaasut politiinit unitsinneqannginnerminni inuppassuit aporarsimavaat, inuillu arlallit aqqunartiterput.
Inuinnaat arfinillit politeerlu ataaseq pineqarput, ataaserlu annertuumik aqqunarsimavoq. Cataloniami ulapungaarsimaniarnermut oqartussat taama ilisimatitsipput.
Illoqarfissuarmi Barcelonami nalunaaquttap akunneri arfineq-pingasut qaangiunnerini assingusumik saassussisoqarnerani inuit 13-it toqutaareersut Cambrilsimi unnuaq taama pisoqarpoq.
AAMMA ATUARUK Barcelonami biili inuit tungaannut apuisoq
Saassussinerit marluusut imminnut attuumassuteqarnissaat Spaniami politiit ilimagigaat, nutaarsiassaqartitsivik Reusters allappoq.
- Saassussinerni periaaseq atorneqartoq ataasiuvoq. Atassuteqarput, nunap immikkoortuani nunami namminermi pissutsinut ministeri, Joaquim Forn, AP naapertorlugu, taama oqarpoq.
Saassussinerilli qanoq imminnut atassuteqarnersut oqaatiginngilaa. Barcelonami saassussisoq suli tigusarineqarsimanngitsoq aamma erseqqissaatigaa.
Cambrilisimi saasussisut tallimaasut biilimi ataatsimi ataatsimoorput, Cambrilsimilu saqqisaartarfiliami pisunniaat aporarpaat.
- Peqqarniisaarniaasorineqartut Audi A3-mik ingerlapput politiit biilianillu naammattoorneqarnissamik tungaanut inuppassuit aporsimavaat. Tamatuma kingorna eqqaanneq pivoq, Cataloniami nunap immikkoortuani naalakkersuisut oqaaseqartartuat taama oqarpoq.
Saassussisut sisamat ingerlaannaq toqunneqarput taallimaallu ikilertiterujussuarsimalluni politiinit tigusarineqarluni. Taanna kingorna unnuakkut toquvoq.
Saassussisut qaartartortalinnik qitequsersorsimasut, nutaarsiassaqartitsivik AP naapertorlugu, Cataloniami oqartussat taama ilisimatitsipput.
Taamaammat politiit qaartartulerisartui aggersarneqarput, taakkulu unnuap ingerlanerani qitequtit qaartartortallit qaartippaat.
/ritzau/
