Sorlak atornerluisimasutut politiinut nalunaarutigineqarpoq
Kultureqarnerput Ilinniartitaanermullu Naalakkersuisoq Nivi Olsen ima oqarpoq.
- Inatsisit malillugit sulisariaqarnerput pissutigalugu, aalajangiunneqarpoq politiit aqqusaarneqartariaqassasut, taamatut suleriuseq inatsisitigut unioqqutitsinerummat, nammineq maanngaaniit suliarissallugu patsisissannginnatta , Nivi Olsen oqarpoq.
Kultureqarnermut Ilinniartitaanermullu Naalakkersuisup Nivi Olsenip ilanngullugu oqaatigaa, tipsimit lottomillu tapiissutigineqartartut aqunneqarnerat 360.000 krnik aningasartaqartoq Kultureqarnermut Ilinniartitaanermullu Naalakkersuisoqarfimmit maanna aqunneqalissasut.
- Tips aamma Lottomit tapiissutit allaffissornikkut aqunneqarnerat 360.000,00 kr-nik aningaasartaqartoq Kultureqarnermut Naalakkersuisoqarfimmut nuunneqarpoq, imatulli paasineqassanngilaq Sorlammut aningaasaliissutigineqartartut 360.000,00 kr-nik ilanngaaffigineqartut, Nivi Olsen oqarpoq, - allaffissornikkut kukkusumik ingerlatsisoqartarsimanera pinngitsoortinniarlugu Tips aamma Lottomit tapiissutit aqunneqarnerat nuunneqarpoq, Nivi Olsen oqarpoq.
Meeqqat inuusuttullu siunnersuisoqatigiiffiat Sorlak 3500inik ilaasortaqarpoq.
Sorlak politiinut nalunaarutigineqarpoq qaammatit sisamat matuma siornatigut.
Sorlaap politiinut suliassanngortinneqarnera pillugu politiinit uppernarsarneqanngillaq suliarli tigusimallugu oqarput.
Meeqqat inuusuttulu siunnersuisoqatigiiffiat Sorlak aningaasanut inatsimmit aamma tips og lottemit katillugit 2,5 millioner krnik tappiffigineqartarpoq.
Sorlammi aningaasatigut ingerlatsinermi torinngitsumik ingerlatsisoqarsimanera siulersuisuni tupaallaatigineqartoq, Sorlammi siulittaasup tullia Ane Berthelsen oqarpoq.
Meeqqanut inuusuttullu susassaqartitsinissaannut aningaasat atorneqartussat allaffisornermut atorneqartarsimanerat Sorlammi ataatsimeersuarnermi siorna aggustimi pisumi paasineqarpoq.
Sorlammi siulittaasup tullia Ane Berthelsen radioaviisimut oqarpoq, Sorlammi siulersuisuusimasut ingerlatsisimanerat ilisimasimanagu, nammineq aggusti 2014-mi aatsaat ilanngukkami, tamatumalu kingorna aatsaat paasisimagitsik kukkusumik ingerlatsisoqarsimasoq, Ane Berthelsen oqarpoq
Tips aamma lottomit tapiissutit aqunneqarnerat Kultureqarnermut Naalakkersuisoqarfimmit isumagineqalernerat Sorlammi ulluinnarni sulinermut sunniuteqassapput.
- Tamanna uagutsinnut annaasaqaataavoq annertoorujussuaq, siulersuisuni tamanna aamma eqqartorparput tamanna uagutsinnut isumaqaqaaq, Meeqqat Inuusuttullu siunnersuisoqatigiiffianni Sorlammi siulittaasup tullia Ane Berthelsen NAIP-meersoq oqarpoq.
Paninguaq M. Kruse Sorlammi 2012-mi siulittaasutut qinerneqarpoq.
Taassuma oqaatigaa, aningaasat Sorlammut tapiissutigineqartartut tassalu aningaasanut inatsimmit pisut aamma Tips aamma Lottomit tapiissutigineqartartut ataatsimoortillugit ingerlanneqartarnerat siulersuisuusimasunit nalinginaasutut isigineqarsimasut.
