Soraasitsineq tatiginassutsimik innarliivoq
Naatsorsueqqissaartarfik kinaassusersiorfiussussaanngilaq, politikkikkullu qanorluunniit inissisimasunit inuussutissarsiornermullu qanorluunniit aallaaveqartunit tatigineqarsinnaasussaalluni.
Politikkikkut anguniakkat inatsisillu atuuttussanngortinneqartut kisitsisit atorlugit nassuiaasiornernit aallaaveqarajuttarmata nassuiaasiat upperineqarsinnaasariaqartut, inuiaqatigiinni pissutsinut ilisimatuutut Ilisimatusarfimmut attaveqartoq, Naatsorsueqqissaartarfimmilu ukiuni 15-ini pisortaasimasoq, Birger Poppel, oqarpoq.
AAMMA ATUARUK Nassuiaatigineqartoq pissusissamisoorsorineqanngialq
Kisitsisimmi atorlugit nassuiaasiarineqartut aallaavigalugit aalajangerneqartut tamatsinnut sunniuteqartarput, Birger Poppel oqarpoq.
Naatsorsueqqissaartarfiullu tatigineqarsinnaanissaa pissutigalugu Henrik Leth siulersuisunit soraarsinneqartoq, aningaasaqarnermut naalakkersuisup Aqqaluaq B. Egedep oqaatigaa.
- Nunatta inuiaqatigiillu aningaasaataasa soqutigisarsiortumik suliarineqannginnissaannik, aamma avataaniit isigineqarnitsinnut uparuaruminaattumik tutsuiginartumillu ingerlatsissagutta, pisariaqarsorivara illersuisinnaasumik tamakkiisumik inissiinissaq, imatuunngitsoq ingerlatseqatigiiffiit imaluunniit kattuffiit arlaannut attuumassutilimmik inissiisumik, Aqqaluaq B. Egede Qanoruumut sisamanngormat taama oqarpoq.
AAMMA ATUARUK Aqqaluap soraarsitsinermut nassuiaataa ataqatigiinngissorineqartoq
Birger Poppelili naapertorlugu, siulersuisut atuuffiata naammassinnginnerani Henrik Lethimik soraarsitsineq nalornilersitsissaaq.
- Tatiginninnermut innarliissaaq, pissutaasutullu saqqummiunneqartoq taama erseqqitsigisumik eqqunngippat, nassuiaatigineqartumut apeqqutilliisoqartoqarsinnaavoq, Birger Poppel oqarpoq.
Aamma Naatsorsueqqissaartarfiup tatiginartunik suliaqarnissaa qulakkeerniarlugu ukiuni pingasuni siulersuisoqartartoq Naatsorsueqqissaartarfiup siulersuisuisa siulittaasuata, Vøgg Løwe Nielsenip, sapaatip akunnerata massuma ingerlanerik oqaatigaa.
- Atuuffiup suli naammassinnginnerani taarsiineq tatiginassutsimut innarliisinnaavoq, Vøgg Løwe Nielsen oqarpoqanerani oqaatigaa.
