Soraarsitsinermik suliaq kukkuneruvoq

Sulisut 47-it ukiup naanerani soraarsitaasussaasut pingasunngormat ilisimatitsissutigineqarpoq. Soraarsitaasussat 30-it Nuummi najugaqarput allat 17-nit Tasiilami Paamiunilu najugaqarlutik.

Kommuneqarfik Sermersuumi sulisut soraarsitaasussat tamarmik allakkatigut nalunaarfigineqarput, tassalu taama iliorneq sulisut kattuffiinit isornartorsiorneqartoq.

Kattuffiit ataatsimoorlutik tusagassiutinut nalunaarumminni allapput, soraarsitsinissamut allakkat soraarsitaasussat angerlarsimaffiinnut, kommunip allakkanil aatsisartuinit unnukkut tunniunneqarsimasut.

- Soraarsitaasussat arlallit kisimiittuupput soraarsitaanissartillu pillugu oqaloqateqarsinnaanngitsunik. Aamma soraarsitsinermi sulisut sinniisaat tamassuminnga paasitinneqanngillat, kommunimi sulisut kattuffii assigiinngitsut arfinillit ataatsimoorussaminnik tusagassiutinut nalunaarumminni ilaatigut taama allapput. Allakkalli nassiunneqannginnerini kattuffiit tamrmik nalunaarfigineqarsimasut kommuni nalunaarpoq.

- Sulisut soraarsitaasussat ataatsimeeqatigineqarnissaat pillugu allakkatigut aggersaavugut. Taamaaliorpugut soraarsitaasussat suleqatimi akornnanni taama paasisaqannginnissaat eqqarsaatiginerullugu, Kommuneqarfik Sermersooq taama akissumminni allapput. Nassuerutigalugulu taamaaliorneq immaqa ingasaassineruvallaalaarsimasoq.

- Kommunip oqaluttuarisaanerani ataatsikkut soraarsitsinernik aatsaat taama amerlatigisunik aqqusaagaqarpugut. Allakkatigullu ataatsimiigiaqqusinerit torrallataavallaanngitsoq atorlutigu. Ajortumilli isumaqarata taamaaliorpugut, pisortaaneq Steffen Ulrich-Lynge oqarpoq.

Taassuma ilanngullugu oqaatigaa, soraarsitaasussat suliffimminiillu ineqartinneqartut inimmit anisitaanavianngitsut. Soraarsitaaasut tamarmik suliunnaarnissami tungaannut, tassa ukiup naaneranut tamakkiisumik akissarsiaqartinneqassapput aamma tamanna nallinngitsoq allamik suliffittaaraluarpataluunniit.

Soraarsitaasussat tamarmik tarnip pissusaanik ilinniarsimasumik oqaloqateqarnissaat isumaqatigiissutaavoq aamma qanoq ingerlariaqqinnissaminnik qanorlu allamik suliffissarsiornissaminnik nalornisut ikiorneqarnissaat aamma isumaqatigiissutaalluni.