Sofia Rossen: Nunarput ebolamut upalungaarsimava?
Inatsisartunut qinersinissamut, novembarip 28-ani pisussami, IA sinnerlugu qinigassanngortittup - Sofia Rossenip - Peqqissutsimut Naalakkersuisuugallartoq, Martha Lund Olsen, Kalaallit Nunaanni ebolap tunillaassuunnissaa pinngitsoortinniarlugu pisortat sunik suliniuteqarnersut innuttaasunut saqqummerluni nalunaaruteqaqquaa.
Kalaallit Nunaanni ebolamut upalungaasimasunik peqarnersoq erseqqissumik paaserusuppaa.
Kalaallit Nunaanniit aamma Kalaallit Nunaannut angalasarnerujussuup kingunerisaanik ebolap tunillaassuunerata maanga apuunnissaanut ulorianartorsiorsinnaavugut, Sofia Rossen KNR-imut oqarpoq, kisiannili maannamut oqartussaasut tungaanniit kalaallit ebolamut upalungaarsimanerat pillugu oqaaseqartoqanngilluinnarpoq, Sofia Rossen KNR-imut oqarpoq.
Upalungaarsimasoqarpat qanoq aaqqissuussaappat? Kikkut suleqataappat? Aamma Kalaallit Nunaat tamakkerlugu sulisoqarpa? Kingullermik minnerunngitsumillu; innuttaasutut upalungaarsimaneq tamanna pillugu qanoq ilisimatinneqassaagut Sofia Rossen aperivoq - ernumanartoqartippaalu Kalaallit Nunaanni innuttaasut ebolamut upalungaarsimasunik tusagaqarsimannginnerat.
