Siunissami silap pissusia pillugu ilisimasat nutaat saqqummiutileraat
Danmarkimi silasiorfiup DMI-p aamma Pinngortitamut, Avatangiisinut Inatsisinillu atuutsitsinermut naalakkersuisoqarfiup suleqatigiissutigalugu tamanna paasiniarsimavaat.
Paasisat teknikerinut, pilersaarusiortartunut allanullu suliaqartunut arlalinnut Nuummi aqagu tallimanngornermi suliaqarluni ataatsimiinnermi saqqummiunneqassapput. Ilisimasat nutaat taakkua, assersuutigalugu attaveqarnermi aningaasaliinissat imaluunniit nunalerinerup iluani suliniutit nutaat pillugit ungasissumut pilersaarutinik suliaqartoqartussanngortillugu, qanoq iliorluni sapinngisamik pitsaanerpaamik atorneqarsinnaanersut qimerloornissaa siunertaavoq.
Suliaqarluni ataatsimiinnermi DMI-ip silap pissusaani ilisimasat nutaat saqqummiutissavai, aammalu Pinngortitamut, Avatangiisinut Inatsisinillu Atuutsitsinermut Naalakkersuisoqarfik silap pissusaanut naleqqussarnissaq pillugu oqaloqatigiinnissamut qaaqqusissalluni.
- Kalaallit Nunaanni siunissami silap pissusaani naatsorsuutigineqarsinnaasut taama sukumiitigisumik takutillugu saqqummiisinnaanerput aatsaat siullermeertumik pivoq. Paasissutissat nalunaarsukkat nutaat atorlugit, nammineq illoqarfigisami qanoq kiatsigissanersoq, aammalu qanoq sivisutigisumik aputeqartarnissaa naatsorsuutigineqarnersoq, takuneqarsinnaapput.
- Tamatuma kingunerisaanik assersuutigalugu Kalaallit Nunaata kujataani sumiiffinni ataasiakkaani silap pissusaa qanoq ilissanersoq takorloorsinnaanerulissavarput, aammalu inuussutissarsiutinik ineriartortitsinermut tunngatillugu isumaliutersuutitsinni ilaatissinnaassallugu, Pinngortitamut, Avatangiisinut Inatsisinillu atuutsitsinermut naalakkersuisoq Mala Høy Kúko taama oqarpoq.
Tamatuma saniatigut DMI aamma Pinngortitamut, Avatangiisinut Inatsisinillu Atuutsitsinermut Naalakkersuisoqarfik ulloq 19. november nal. 19:30 – 21:00 Katuami ammasumik aaqqissuussinermut qaaqqusipput. Tassani DMI taamatuttaaq siunissami silap pissusaa pillugu oqaluttuassaaq.
Aaqqissuussineq Digitalimik sullissinermut aqutsisoqarfiup nittartagaatigut toqqaannartumik isiginnaarneqarsinnaavoq.
