Siumut Sisimiut: Akileraarut 1 procentimik qaffanneqarli
Akileraarutip 1 procentimik tassunga taarsiullugu qaffanneqarsinnaanissaanut Atassutip siunnersuutaa assigalugu Siumut Sisimiuni maanna siunnersuuteqarpoq. Siumut Sisimiuni siulittaasua Lars Jørgen Kleist, Siumut Sisimiut sinnerlugu tusagassiuutinut taama nalunaaruteqarpoq.
Siumut Sisimiut isumaqarpoq akitsuutit assigiinngitsut qaffanneqarnissaat isertitakinnerusunik eqquissasoq. Kalaalimerngit assigisaallu akisunerat eqqarsaatigalugu isertitakinnerit eqqorneqarneruinnassasut Siumut Sisimiut isumaqarpoq.
AAMMA ATUARUK Steen Lyngep akitsuutit qaffannagit akileraarutit qaffakkusuppai
Akitsuutinik qaffaanissamut taamanikkut naalakkersuisoqatigiit Inuit Ataqatigiit, Demokraatillu Kattusseqatigiillu Partiiata siornatigut siunnersuutigisarsimasaannut Siumup Inatsisartuni ilaasortaatitaasa siornatigut akerliusarsimanerat, Siumut Sisimiut eqqaasitsissutigaa.
Akitsuutillu qaffanneqarnissaannut Naalakkersuisut siunnersuuteqarnerannut taarsiullugu isertitanut akileraartarnerup 1 procentimik qaffanneqarnissaanut Atassutip siunnersuutaa orniginarnerusoq, Siumut Sisimiuni siulittaasuata Lars Jørgen Kleistip oqaatigaa.
