Steen Lyngep akitsuutit qaffannagit akileraarutit qaffakkusuppai

Akitsuutit qaffanneqarnissaannut siunnersuut assigiingitsunik isertitaqarneq eqqarsaatigalugu naapertuutinngitsut, Atassut sinnerlugu Inatsisartuni ilaasortap Steen Lyngep tusagassiuutinut nalunaarummi oqaatigaa, kisitsisillu tunngaviginiakkat aamma naapertuutinnginnerarlugit.

Akitsuutit qaffanneqarniarnerannut taarsiullugu akileraartarnermi qaffaasoqarnissaa taassuma orniginartinneruaa:

- Akileraarut 1 procentimik qaffanneqarpat tamanna assigiinngitsunik isertitaqarnermut naapertuunnerussaaq, taamaaliornikkummi assigiinnerusumik nammatassiisoqarsinnaassammat, isertitakinnerusullu eqqorneqarnerat aamma minnerpaaffimminiitinneqassammat, Steen Lynge allappoq, nangillunilu:

- Isertitassatut naatsorsuutigineqartut akileraarutip qaffanneqarneratigut aningaasanut inatsisissatut siunnersuummut naammanngippata Atassut tupanut nioqqutissanullu peqqinnanngitsunut allanut akitsuutinik qaffaasoqarnissaanut siunnersuummut isumaqataasinnaavoq, Atassut sinnerlugu Inatsisartuni ilaasortaq allappoq.

Aamma atuaruk PolarOil: Uliap qanoq akikillitiginissaa naluarput

Aningaasanut inatsisissatut siunnersuutip amigartoorfiunnginnissaa siunniunneqarpat inuuniarnikkut aningaasartuutit amerlinissaat allaqqunneqarsinnaanngitsoq Atassut isumaqarpoq, isertitalli assigiinngitsuunerannut naapertuunnissaat aamma ujartorlugu:

- Aalajangigassat ilungersunarsinnaasut aalajangiunneqassappata, assigiinngitsunik isertitaqarnermut naapertuunnissaat pisariaqarpoq, Steen Lynge oqarpoq.

Uuliamulli akitsuutip qaffanniarneqarnera Atassutip isumaqatiginngilaa:

- Uuliap akigiumaagaa siumut ilisimaneqareerneq ajorpoq, Steen Lynge oqaropq.

Aamma atuaruk Nunatta karsiata amigartooruteqannginnissaanut siunnersuutit isumaqatigineqanngillat

Uuliamut akitsuutit neqinullu akitsuutit qaffanneqarpata assigiinngitsunik isertitaqarneq eqqarsaatigalugu tamanna naapertuunnavianngitsoq taassumaoqaatigaa:

- Uuliamut neqinullu aningaasartuutit kikkunnut tamanut eqquissaaq. Uuliamut neqinullu akitsuutinik qaffaaneq assigiinngitsunik isertitaqarneq eqqarsaatigalugu naapertuunnavianngilaq, akuersaarneqarsinnaananilu, Atassut sinnerlugu Inatsisartuni ilaasortaq Steen Lynge tusagassiuutinut ilaatigut taama allaaserisaqarpoq.

Aamma atuaruk Aningaasanut Inatsit: Akileraarutip qaffanneratigut Nunatta karsia isertitaqassaaq