Siumut Ilulissani ataatsimeersualertoq
Ataatsimeersuarnissaq Ilulissaniissasoq pilersaarutaaqqaarpoq, coronali nunatsinnut anngummat Siumup siulersuisuuneri ataatsimiinnissaq siulittaasussarsiornerinnaassasoq digitalikkullu ingerlanneqassasoq aalajangerpaat. Tamannali immikoortortaqarfiit naammagisimaanngilaat. Maannali Siumup siulersuisuuneri nutaamik aalajangiipput.
Ilulissani septembarip ulluisa sisamaannit arfernannut ataatsimeersuartoqassaaq, Evelyn Frederiksen, Siumumi aaqqissuussaanermut siulittaasup tullia nalunaarpoq.
AAMMA ATUARUK Siumup ataatsimeersuarnissaa kinguartinneqassasoq aamma qarasaasiatiguussanngitsoq
- Ataatsimiinnermi najuulluni ataatsimiittarfimmilu peqataalluni ajunnginnerpaavoq oqallinneq uummaarinnerusoq ingerlanneqarsinnaammat, partiip siunissami anguniagai aalajangersorneqalerpata aammalu siulersuisuunernut qinersisoqalerpat, Evelyn Frederiksen allappoq.
Digitalikkut ataatsimiinnissaq mianersortumik tunngaveqarluni aalajangerneqaraluarnikuusoq, maannalu pisut aallaavigalugit annikikkaluartumik isumalluarnerulerlutik pisarnertillu malillugu ukioq manna kingusinnerulaartukkut ataatsimeersuarsinnaalerlutik, taanna allappoq.
- Kissaatigilluinnaratsigu sapinngisatsinnik immikkoortortaqarfinniit aallartitat ilaasortallu ataatsimeersuarnermi najuullutik peqataassasut, tamannalu aasaq manna peqqinnikkut tunngaveqartumik illersorneqarsinnaanngilaq nualluussuaq Covid-19-i eqqarsaatigalugu. Tamanna pissutigerpiarlugu siulersuisuunerit immikkoortortaqarfiit peqatigalugit nalilersimavaat, ataatsimeersuarnissaq ukiamut kinguartinneqassasoq, Siumumi aaqqissuussaanermut siulittaasup tullia allappoq
AAMMA ATUARUK Siumup immikkoortortaqarfii: Ataatsimeersuarnissaq ukiarumut kinguartilli
Parteeqatigiit naapinneranni Covid 19-imut innersuussutit malilluinnaqqissaarneqarumaartut, Evelyn Frederiksenip nalunaarutigaa.
