Politikki

Siumup ilumoornerarpaa: Aleqa Hammond Folketingimut qinigassanngortikkusutanut ilaavoq

Partiip siulittaasorisimasaa Folketingimut qinigassanngortitassatut partiip immikkoortoqarfiata innersuussutaani akuuvoq. Taava kikkut qanorlu amerlatigisut Folketingimut qinigassanngortissanersut, Siumup siulersuisuunerisa aalajangerumaassavaat.

Allattoq Sandra Meinecke, Jens Thorin

maajip 19-at 2015 17:58

Aleqa Hammond naalakkersuinikkut sulinermut tupaallannartumik uteqqeriaannaavoq.

Inuttaata nammineq tamanna KNR-imut ilumoornerarnagulu ilumuunnginneranngilaa.

Kisianni Aleqa Hammondip aqqa partiip immikkoortoqarfiisa qinigassanngortitassatut innersuussaannut ilaasoq, Siumup allattaanerata, Mikael Petersenip, KNR-imut uppernarsarpaa.

Kisianni kikkut qanorlu amerlatigisut Folketingimut qinigassanngortissanersut, Siumup siulersuisuuneri suli aalajanginngitsut, Mikael Petersen allappoq.

Aamma atuaruk Aviisi: Aleqa Hammond politikkimut uteqqilersoq

Siumup siulittaasua, Kim Kielsen, AG-mut oqarpoq, Aleqa Hammond qinigassanngortittut allattorsimaffiani ilaassanersoq nammineq akuliuffigerusunnagu.

- Kikkut qinigassanngortissanersut siulersuisuunerit aalajangertussaavaat. Kikkut qinigassanngortissanersut uanga aalajangiinnarsinnaanngilara, Kim Kielsen AG-imut oqarpoq.

Siumup politikkikkut oqaaseqartartuata, Jess Svanep, AG-imut erseqqissarpaa, Aleqa Hammond "arlaannut tunngasumik eqqartuussaanikuunngitsoq", taamaammallu Folketingimut qinigassanngortinnissaanut sumilluunniit akornutissaqanngitsoq.