Aviisi: Aleqa Hammond politikkimut uteqqilersoq
Atuagagdliutit naapertorlugit Hammondip Folketingimut qinigassanngortinnissaa partiip Siumup Nuummi immikkoortortaqarfiata siunnersuutigisimavaa.
Aleqa Hammondilli qinigassanngortinnissani ilumoornersoq ilumuunnginnersorluunniit aviisimut oqaatigiumanngilaa.
Aleqa Hammond 2013-imi apriilip qaammataani Naalakkersuisunut siulittaasunngorpoq, Inatsisartunut qinigasanngortittuni taaguunneqarnerpaalluni.
2014-imilu septembarip qaammataani tunuartariaqalerpoq, paasineqarmat pisortat aningaasaataannik 100.000 koruunit sinnerlugit atorfimminut attuumassuteqanngitsunut atuisimasoq.
AAMMA ATUARUK Aleqa Hammondip nunatta karsianik atornerluisimanera
Tamatuma kingunerisaanik Inatsisartunut qinersisoqarnissaa suaarutigineqarpoq Aleqa Hammondilu qinigassanngorteqqinnani.
Siumulli Naalakkersuisunut siulittaasuutitaqarneq pigiinnarpaa, Kim Kielsenilu Naalakkersuinut maanna siulittaasuuvoq.
Taassuma Aleqa Hammond Folketingimut qinigassanngortinneqassanersoq akuliuffigiumanngilaa.
- Kikkut qinigassanngortinneqassanersut siulersuisuunerit aalajangigassaraat. Kina qinigassanngortissanersoq uanga aalajangiinnarsinnaanngilara, aviisimut oqarpoq.
Aleqa Hammond Atuagagdliutit naapertorlugit akiligassani 106.363,72 koruuniusut maanna akilereersimavai.
Siumup politikkikkut oqaaseqartartuata Jess Svanep aviisimut erseqqissaatigaa Hammond "pineqaatissinneqarsimanngimmat" taamaattumillu Folketingimut qinigassanngortinnissaanut akornutissaqanngitsoq.
Aamma atuaruk Qujaukitsoq: Hammondip Pituffik pillugu suliami qanoq akuutigisimanera misissorneqassaaq
Aviisilli Berlingskep 2013-imi ukiakkut allaaseraa Hammond akunnittarfimmut 5100 koruunit nalinginut peqquserluttuliorsimasutut 1996-imi pineqaatissinneqarsimasoq, kreditkortini matoqqasoq atorlugu arfineq-marloriarluni akiliisimalluni.
Siumup Folketingimi maanna ilaasortaatitaa tassaavoq Doris Jakobsen, nunatsinniillu ilaasortaasup aappaa tassaalluni Johan Lund Olsen Inuit Ataqatigiinneersoq. Taanna partiip siulittaasuanut Sara Olsvigimut, septembarip qaammataani Folketingimi sulinerminit killiligaanngitsumik sulinngiffeqartumut sinniisutut ilaasortanngortinneqarpoq.
/ritzau/
