Siumup IA-llu tuluit oqaasii itigartitsissutigigaat
Kalaallisut oqaatsivut ikitsuinnarnit atorneqarlutillu paasineqarsinnaapput. Taamaammat ilinniakkamik toqqaanissatsinnut periarfissat pitsaanerulersinniarlugit danskisut tuluttullu oqalulluarsinnaaneq pingaarpoq. Nivi Olsen tuluit oqaasiinik 1. klassimit takornartat oqaasiisut atuartitsisoqartalernissaanik siunnersuutiminut taama tunngavilersuuteqarpoq.
AAMMA ATUARUK Oqaatsinik ilinniartitsineq immikkut ilisimasalinnit misissorneqassaaq
Naalakkersuisulli siunnersuutip itigartitsissutigineqarnissaa kissaatigaat, Naalakkersuisut suleqatigiissitamik immikkut ilisimasalinnik nunanit assigiinngitsuneersunik inuttalimmik pilersitsisimanerat tunngavilersuutigalugu, taakku innersuussusiussapput qanoq iliorluni oqaatsinik ilinniartitsinerup pitsanngorsarlugulu ineriartortinnissaanik, taamaaliornikkut meeqqat inuusuttullu oqaatsinik pigiliussisarnerat nukittorsarumallugu.
Tuluttut atuartitsineq pillugu aalajangernissaq 2018-imi upernassamut kinguartinneqassasoq Naalakkersuisut siunnersuutigaat.
AAMMA ATUARUK Minik Rosing: Kalaalinngorsaanerup meeqqat atuarfiat aserorpaa
Oqaatsitta pingaarnerunerat Siumup IA-llu isumaqatigiissutigaat
Meeqqat danskisut tuluttullu oqalussinnaasariaqarnerat pillugu Inuit Ataqatigiit Demokraatit isumaqatigaat, 1. klassemiilli tuluttoortalernissaq siusippallaarsoralugu.
- Kissaatigaarput meerartatta kalaallisut oqaatsivut ilikkarluarsimallugit allamiut oqaasiinik aatsaat ilinniartalernissaat, Inuit Ataqatigiit oqaaseqartartuat Mimi Karlsen taama allappoq siunnersuullu itigartitsissutigalugu.
Siunnersuutip itigartitsissutigineqarnissaa Siumup aamma kissaatigaa, oqaatigalugulu ilisimatuussutsikkut ilisimaneqareersoq meeqqat oqaaseqqaatiminnik pitsaasumik tunngavissinneqarsimagaangamik b allanertat oqaasiinik ilikkalertornerusartut.
Nivi Olsenip siunnersuutaa taamatut iluseqartillugu aappassaanerneqartussanngortinneqarpoq Inatsisartunillu maajip 30-iani taasissutigineqarpat itigartitsissutigineqarnissaa ilimanarluni.
AAMMA ATUARUK Tuluit oqaasii takornartat oqaatsini sallersaalissanersut Inatsisartut oqallisigileraat
