Tuluit oqaasii takornartat oqaatsini sallersaalissanersut Inatsisartut oqallisigileraat

Inatsisartut ukiaanerani ataatsimiinneranni meeqqat atuarfianni danskisut ilinniarneq tuluit oqaasiinik taarserneqassanersoq oqallisigissavaat.

Siunnersuut ilinniartitaanermut naalakkersuisumit Demokraatineersumillu Nivi Olsenimit taperserneqarpoq. Kisianni Demokraatit oqaaseqartuata Justus Hansenip tamanna tapersinngilaa.

- Isumaqaramama danskit tuluillu oqaasiinik assigiimmik ilinniartitsisoqarsinnaasoq, Inatsisartunut ilaasortaq Demokraatineersorlu Justus Hansen taama oqarpoq.

Siumumeersup Vivian Motzfeldtip tamanna Inatsisartunut oqallisigisassanngortippaa, tuluimmi oqaasii nunat assigiinngitsut akornanni danskit oqaasiinut sanilliullugit atorneqarnerusartut, taanna isumaqarpoq.

Tunngavilersuummut paasinninnini Justus Hansenip oqaatigaa, isumaqataanngilarli.

- Danskit oqaasiinut ilinniarnikkuinnaq attuumassuteqanngilagut, ilaqutariissutsikkut kulturikkullu aamma attuumassuteqarfigaarput, Justus Hansen oqarpoq.

Ilinniartitaanermut naalakkersuisup Nivi Olsenip akissummini oqaatigaa Naalakkersuisut matumunnga inatsimmik allannguutissatut Inatsisartut ukiup tulliani ukiaanerani ataatsimiinneranni saqqummiussinissaminnik pilersaaruteqartut.

Tassa meeqqat atuarfianni ilinniartitsinermi tuluit oqaasii takornartat oqaasiini aggusti aallarnerlugu 2018-imi  sallersaalernissaat pillugu siunnersuut.

Justus Hansenilli tamanna pisariaqarsorinngilaa.

- Ataatsikkut ilinniarneqarsinnaapput, aamma kalaallit oqaasiinik ilinniaraluarluni. Killiliinanga periarfissat ujartorneruakka, Demokraatit oqaaseqartuat Justus Hansen oqarpoq.

Meeqqat atuarfianni tuluit oqaasii takornartat oqaasiini sallersaalissappata Nunatsinni meeqqat atuarfiat aaqqissuuteqqinneqartariaqassasoq, naalakkersuisup Nivi Olsenip erseqqissaatigaa.