Poul Hansen: Angutitut tiguara
Naatsorsuutigineqartutut, 31-nik ukiulik Randi Vestergaard Evaldsen siulittaasumut qinersisoqarnerani amerlanerussuteqarluartunit taaneqarluni siulittaasunngorpoq.
Demokraatit nuna tamakkerlugu immikkut ittumik ataatsimeersuarneranni siulittaasumut qinersinermi taasinerit imaapput:
Randi Vestergaard Evaldsen, qulingiluanik taaguunneqarpoq, Justus Hansen pingasunik kiisalu Poul Hansen taaneqanngitsoq.
Akisussaaffik annertooq
Randi Vestergaard Evaldsen ajugaanermi kingorna nuannaarpoq taannalu ima oqarpoq.
- Nuannersorujussuuvoq akisussaaffk annertooq tigullugu, Demokraatini siulittaasutut qinigaasoq Randi Vestergaard Evaldsen oqarpoq.
Siulittaasutut qinigaarlaaq unammillertigisaminut Justus Hansenimut Poul Hansenimullu tuppallersaavoq.
- Siulittaasumut qinigassanngortinneq annertusimavoq aamma sakkortusimavoq, pikkorilluinnartunik marlunnik unammillerteqarpunga, piareersivunga, aamma nalunngilara taakkua marluk piareersimasut suleqatigiinnissatsinnut, taamaattumik ingerlariaqqinnissatsinnut piareersimavugut, politikkittalu ingerlateqqinnissaanut, Randi Vestergaard Evaldsen oqarpoq.
Qanigisamik napparsimasoqarneq
Justus Hansen qanigisamini napparsimasoqarnera pissutigalugu siulittaasunngorniunnermi najuutinngilaq. Siulittaasumut qinigassanngortittut pingajuat Poul Hansen taasinermik ataatsimiilluunniit taaneqannginnami ajuusaarpoq.
- Uanga ajorsarpunga - Randi ajugaavoq, taanna allanngortissinnaanngilara, qinersisinnaasut Randi qinerpaat, taamaattumik ajorsarnera angutitut,tiguara aamma sapinngilara ingerlaqqissallunga, imaanngilaq ajorsarama unittunga ingerlaqqissaanga, aamma nalunngilara uanga ajugaasuuguma Randip tapersersussagaanga, taamaammat pingaartippara suleqatigiinneq suli ingerlaqqissasoq.,Poul Hansen Demokraatini siulittaasunngorniunnermi qinigassanngortittut pingajuat taama oqarpoq.