Sisimiuni erlinnartuutinik maanna ujaasisoqaleruttorpoq
Atomip nukinganik saassussisoqarnerata kingorna Danmark aamma Kalaallit Nunaat qanoq sanaartorneqaqqissinnaanerannut tunngasunik karsi imaqarnerarneqarpoq.
- Siullermik tusaqqaarakkuli paasisaqarfiginerorusuummerpara. Imami eqqarsarama: Tamanna annerusumik paasisaqarfigerusuppara, Politikenimi aviisiliortoq Mikkel Vuorela taama oqarpoq. Taanna assiliisartumik aappaqarluni karsimik ujaasiartorluni juunimi Sisimiuniippoq.
Ujaasineq tamanna Politikenimi maanna allaaserineqarpoq.
Sanaartukkanik uuttortaanermi aallaavigineqartunik imaqarpoq
Siornatigut Danmarkimi nunap assiliortuisa pisortaanit Sorsunnerup Nillertup nalaani karsi 1952-imi toqqorneqarpoq oqaatigineqarlunilu Kalaallit Nunaanni Danmarkimilu sanaartukkanik uuttortaanermi aallaavigineqartunik tamanik imaqartoq.
- Kalaallit Nunaanni Danmarkimilu nunamik uuttortaanerni aallaaviusut tamaasa pillugit paasissutissanik katersivinnik toqqortanik karsi ulikkaarpoq. Soorlu Danmarkimiittoq Lillebæltsbro qaartinneqaraluarpat sananeqaqqinnissaanut uuttortaanermi atorneqartut suliareqqinnissaat suliassaangaatsiartussaassammat.
Karsi ullorsiutini arlalinni allaaserineqarpoq, inissiffiusinnaasullu arfineq marluunerarneqarlutik.
AAMMA ATUARUK Aviisi Politiken isertuussanik toqqortanik ujaasivoq
Karsip imai suli atorfissaqarluarput
Karsi Sisimiunut angalanermi nassaarineqarnersoq Mikkel Vuorelap oqaatigerusunngikkallarpaa.
Naak Kalaallit Nunaat Danmarkiluunniit Sorsunnerup Nillertup nalaani saassunneqanngikkaluartut karsip imai suli atorfissaqarluartut taanna isumaqarpoq.
- Nunarsuup inuuffitta qanoq inneranik eqqarsaatiginninnissamut atorneqarsinnaavoq. Tamatumani ilanngullugit qanoq allanngoriartortoqarsimanera aamma Danmarkip Kalaallit Nunaatalu akornanni pissutsit eqqarsaatigalugit - oqaluttuamimi matumani tamanna saqqummiunniarneqarmat, piffissarmi pineqartoq maanna ullutsinni inuunitsinni tunngavigigatsigu, Mikkel Vuorela naggasiivoq.
Mikkel Vuorelalli ilanngullugu oqaatigaa karsi ujarneqartoq pillugu paasissutissanik suli kissaateqartoqartoq.
Taamaattumik tassuma karsi pillugu karsillu imaanik paasissutissiisinnaasut tusagaqarfigerusuppai, paasissutissat mikkel.vuorela@pol.dk -mut nassiunneqarsinnaapput.
Ujaasineq katersugaasivinnut soqutiginartoq
Karsimik sorsunnerup nillertup nalaaneersumik aviisip Politikenip ujaasinera Sisimiuni aamma Kangerlussuarmi katersugaasivinnut soqutiginartuuvoq.
Tassami naak Sorsunneq Nillertoq sakkulersorluni sorsuunnermik kinguneqanngikkaluartoq, karsip imai illoqarfiit aarlerinartorsiornerup nalaani pingaaruteqassusiannik oqaluttuarsinnaammata.
Aviisiliortoq Politikenimeersoq karsimik 1952-imeersumik ujarlerluni saaffiginnimmat, Sisimiuni aamma Kangerlussuarmi katersugaasivimmi sulisut suliatik allat unitsiinnarlugit taanna kisiat sammilerpaat.
Katersugaasiviup pisortaa Christine Løventoft taama oqaluttuarpoq.
- Eqqatsinni nanineqarsinnaanera maanilu nanineqassagaluarpat katersugaasiviit maaniittut akisussaaffigissammassuk pingaarnertut soqutiginaatigaa. Tamatuma saniatigut Sorsunnerup Nillertup nalaani Kalaallit Nunaata pingaarutaanik oqaluttuartuussaaq, tamatumani ilanngullugu Kangerlussuaq Amerikamiut aamma sakkutooqarfigisimammassuk.
Karsip piunera katersugaasivimmit ilisimaneqarpoq, ujarneqanngisaannarsimallunili. Aamma naak nanineqarnissaa Christine Løventoftip naatsorsuutiginngikkaluarlugu imai suli soqutiginaateqarnerarpai:
- Sorsunneq nillertoq pillugu annerusumik nutaarsiassartaqarnavianngitsoq, tusaannarlugu eqqarsaatigaara, oqaluttuamulli nalunngeriikkatsinnut assersuutaassalluni. Aalajangersimasumilli aallaaveqarluni oqaluttuassartaqarnera uatsinnut katersugaasivimmiunut soqutiginaateqartussaavoq.
Karsi toqqorneqarsimasoq pillugu aviisimi Politikenimi atuarsinnaavutit. Inuit karsi pillugu paasissutissiisinnaasut aviisiliortup pineqartup aamma paasisaqarfigerusuppai.
