Aningaasanut inatsit 2018: Sinneqartooruteqarnermit amigartooruteqarninngortoq
Naalakkersuisut aningaasanut inatsisissatut siunnersuutip aappassaaneernissaanut allannguutissatut siunnersuutaat sisamanngormat saqqummiunneqarput.
Sermitsiaq.ag allannguutissatut siunnersuutit siunnersuummut, 8,6 millionit koruuninik sinneqartooruteqarfiusussatut saqqummiunneqaqqaartumut, 8,6 millionit koruuninik amigartooruteqarfiutitsipput.
Allannguutissatut siunnersuutit ingerlatsinermut sanaartornermullu tunngasunut 17,2 millionit koruuninik ajorneruleriartitsisut, aningaasaqarnermut naalakkersuisoqarfiup KNR-imut uppernarsarpaa.
AAMMA ATUARUK Aningaasarsiorneq siuariartorunnaamisoq
Naalakkersuisut raajarniarnermit isertitassatut naatsorsuutigineqartut 10 millionit koruuninik qaleralinniarnermiillu isertitassatut naatsorsuutigineqartut 5 millionit koruuninik ikilisippaat.
Qalerallit Qeqertarsuup Tunuani tunineqartut ikilerujussuarnerat tamatumunnga ilaatigut pissutaavoq. Avataasiorlunili qaleralinniarneq ingerlalluarneruvoq, tassanilu isertitassatut naatsorsuutigineqartut amerlipput.
Ukiuni sisami amigartoorutissat 27,8 millioniusut
Nammineerlunilu sanaartortitsinerit ineriartorfiunerat tunngavigalugu naqissusiinermut akitsuutit 10 millionit koruuninik isertitsissutaanissaat Naalakkersuisut naatsorsuutigaat.
Naalakkersuisut allannguutissatut siunnersuutaat 27,8 millionit koruuninik ukiuni tulliuttuni sisamani amigartoortitsissapput.
Siunnersuutilli allat amigartoornerutitsisinnaassapput. Inatsisartut siulittaasoqarfiata partiinut tapiissutit 30 procentinik amerlinissaat pillugu siunnersuutaa ukiumut 2 millionit koruuninik aningaasartuutaasassaaq.
AAMMA ATUARUK Peqqinnissaqarfimmut amerlanerusunik aningaasaliisoqassasoq
Aamma inuit innarluutillit ikorfartorneqarnissaannut inatsisissatut siunnersuut Inatsisartunit ataatsimiinnermi matumani siullermeerneqartussaavoq.
Siunnersuutip taassuma Naalagaaffiit Peqatigiit innarluutilinnut tapersiisarneq pillugu isumaqatigiissutaat tunngavigaa, akuersissutigineqassappallu 2019-imit 2021-imut ukiumut 75 millionit koruuninik aningaasartuutaasassaaq.
2017-imut aningaasanut inatsisissatut siunnersuut, oqimaaqatigiittutut saqqummiunneqaqqaartoq, siorna ukiakkut isumaqatiginninniutigineqareermat ukiut sisamat ingerlanerini 145 millionit koruuninik amigartooruteqarfiusussanngorpoq.
