Sirius Sillimaniarnermut pisussaaffipput naammassivarput
Angut 18-inik ukiulik qallunaat nunaanneersoq qamuteralannik ajutoorluni ajunaarmat, sillimanissamut maleruagassat malinneqarput. Ajunaarneq arfininngornermi pimmat qamuteralatsitsinermik aaqqissuussisuusut Sirius Greenlandip pisortaa Bo Lings taama ilisimatitsivoq.
- Sillimaniarneq pillugu tamakkiisumik ilitsersuunneqarput. Video ilitsersuissut isiginnaarpaat. Taava aamma angalaarfissaminnut aallartigatik aqoriaatsinik sungiusartarfimmi ilitsersuunneqarput, Sirius Greenlandimi pisortaq Bo Lings oqarpoq.
AAMMA ATUARUK Qamuteralannik ajutoorluni ajunaartoq Danmarkimi ilinniartuunngorniarfimmi aliasuutigineqartoq
Angut 18-inik ukiulik Danmarkimi Kalundborgimi Allikelundip ilinniarnertuunngorniarfianeersuuvoq, atuaqatini allat 16-it ilagalugit ilinniarnerminnut atatillugu Sisimiunut tikeraarlutik.
Aqqut manissuinnaq
Ilinniarnertuunngorniat Danmarkimeersut qamuteralannissaq naminneq pilersaarusioraat, Sisimiuni ilinniarnertuunngorniarfimmi pisortaq nassuiaavoq.
Ilinniartut Sisimiuniit Kangerluarsuk Tullermut arfininngornikkut ualikkut ingerlaartillugit angut ajunaarpoq. Angallassisartut Sirius Greenland angalanermik aaqqisuisuusut pisortaata oqaatigaa, ajutoornerup nalaani ingerlavimmi sila atoruminartoq.
- Ajunaarfiusup nalaani aqqut manissuinnaammat ajutoorneq qanorpiaq pisimanersoq iluamik nassuiaatissartaqartinngilarput. Kisianni taamaakkaluartoq ajunaartoq aqqummi tassanerpiaq ajunaarpoq.
Sillimanissamut maleruagassat malinneqartut
Atuartut qamuteralannik ingerlaartut tamarmik niaqorortinnaveeqquteqarput, akunnermullu 40-50 kilomiiterinik sukkassuseqarlutik ingerlasimasut pisortaq paasissutissiivoq, ajunaarnerlu iluatsitsinerliorujussuarnikkut pinerarlugu.
-Attorteqqasorujussuuvugut. Naak sillimaniarneq eqqarsaatigalugu pisussaaffipput naammassisutut isumaqarfigigaluarlugu, arlaatigut akisussaaffeqartutut misiginngitsoorneq ajornaqaaq. Taamaammat eqqorteqqaqaagut, Bo Lings oqarpoq.
AAMMA ATUARUK Angut inuusuttoq qamuteralannik ajutoorluni ajunaartoq
Taassuma ilinniarnertuunngorniarfimmilu pisortap upalungaarsimasut ikiuipallassimanerat nersualaarpaat.
- Ilinniartut, ilinniartitsisut, namminneq kajumissutsiminnik ikiuuttut angallasisullu kommunip qitiusumik katsorsaaviani tarnip pissusaanik ilisimasalimmik ikiorneqarnissaminnik neqeroorfigineqarput, Sisimiuni ilinniarnertuunngorniarfimmi pisortaq Poul V.B. Jensen oqarpoq.
