Qamuteralannik ajutoorluni ajunaartoq Danmarkimi ilinniartuunngorniarfimmi aliasuutigineqartoq
- Ilinniarnertuunngorniartut ukiaq Allikelund Gymnasiumimi Kalundborgimiipput, maannakkullu atuartut pitsaasumik ilikkagaqarfiusumillu misigisaqartittussanngorpagut, Poul V. B. Jensen, KTI/GUX-imi Sisimiuni rektori, Sermitsiaq.AG-mut taama ilaatigut oqarpoq.
Arfininngormat ualikkut ajutoortoqarmat ajornartoornermi upalungaarsimasunik erngertumik pilersitsisoqarpoq, danskillu kalaallillu ilinniartut, ajutoornermilu kajumissutsimik ikiuuttut taakku ikiorpaat.
AAMMA ATUARUK Angut inuusuttoq qamuteralannik ajutoorluni ajunaartoq
Kalundborgimi ilinniartut Danmarkimut sisamanngorpat aatsaat utertussaagaluarput, ullumikkulli ataasinngornermi Danmarkiliartussanngorlutik.
Ilinniartut Air Greenlandip suligasuarneratigut Danmarkimut piaarnerpaamik utersinnaanngorput:
- Air Greenland nersualaartariaqarpara, atuaqatigiit ataatsimut Kangerlussualiariarlutik Københavnimut ataasinngornermi ullumikkut ingerlaqqissinnaaniassammata timmisartumik saniatigut ilanngussimmat, Poul V. B. Jensen oqarpoq.
Kalaallit ilinniarnertuunngorniat ataatsimoorlutik danskit ilinniarnertuunngorniat inuulluaqquaat:
- Nalunaaqutaq ulloqeqqartoq ilinniarnertuunngorniarfimmi minutsi ataaseq nipaallisimavugut. Ajutoorneq tassani malunnartinniarneqarpoq, kisianni aamma arlaatigut ingerlaqqinniassagatta naggaserlugu, Poul V. B. Jensen, Sermitsiaq.AG-mut taama oqaluttuarpoq.
