Greenland Icemiit sikut nerisassiornermik pikialaartitsinermi aapput
Aarhusimi Food Festival tallimanngormat ammarneqarmat alakkarterisut Greenland Icemillu suliaqartut sikut aassimasut paasivaat.
Sikullu sermersuarmit imermit sanaajummata sermersuup assimaneranik oqaatigaat. Greenland Ice Nuummeersup sermersuarmit imermik sikuliani Food Festivalimi tuniniartussaasani aassimammata qerititsivii imaqanngitsut festivali ammarpoq.
Food Festivalimik aaqqissuisut kukkullutik qerititsivimmut innaallagissat unnuakkut qamissimavaat, taamaalillunilu sikut 300 literit aallutik.
Tamannalu, soorunami, Greenland Icep piginnittuata Maik Carreterop nuliatalu Marjam Carreterop, festivalimi sikunik tuniniaaqataasup, ajuusaarutigeqaat.
- Ullaaq takkukkatta sikut tamarmik aassimapput. Tuniniagassagut tamarmik imerpalasuinnanngorsimapput, Marjam Carretero KNR-imut oqarpoq, nangillunilu, sikut aannikut qeriteqqinneqarsinnaanngillat issornerat allanngortarmat.
Sikunik nassiussat ajutoorpoq
Tamannali kisimi ajutoorutiginngilaat, Greenland Icemmi festivalimut sikunik allanik nassiussisussaarupput.
Greenland Icemmi sikut RAL-ikkut nassiussai, Food Festivalimut alakkarterisunut misiliutissatut takorluukkat, kukkullugit Aalborgimit Aarhusiliaannagit Københavniliaanneqarsimapput.
Taamaalillunilu Greenland Icemit nerisasiornermi pikialaartitsinermi tuniniagassaqaratillu takutitassaqanngillat.
- Eqqarsarpugut: Ajornerulersinnaanngilaq. Naggataatigut quianarlunilu qiasunngunarsiinnarmat illaatigiinnalerparput, Matjam Carretero oqarpoq.
Soorlu sermersuaq
Greenland Icemullu alakkarterisut aamma illaatigiinnartariaqarsimavaat.
- Ajuusaarutigaat. Kisiannili aamma illaqartarput oqarlutillu soorlu sermersuaq (aattooq, aaqq.). Arfininngorpallu sikuuteqalerutta misiliiartorumasarlutik, Marjam Carretero oqarpoq.
Greenland Icep tallimanngornerup ingerlanerani Københavnimit sikunik tikittoornissartik isumagipallasimavaa.
Greenland Ice 2008-mi pilersinneqarpoq ullumilu Nuummi tunisassiorfiani arfinilinnik sulisoqarluni. Kalaallit Nunaanni pisiniarfinni assigiinngitsuni sikut tuniniarneqartarput aammalu Københavnimi Magasin Du Nordimi Tranhusetimilu Aalborgimilu Mumsimi tuniniagaallutik.
