Tabithe Sværd: Sikkilikka innaallagiatortut atorsinnaannginnakkit uggornarpoq
Imminut assartornermi sikkilit innaallagiatortut atornissaat inerteqqutaasut Kalaallit Nunaata politiivi oktobarip aallartinnerani nalunaarutigaat. Sikkilinut angallannermut inatsit 1979-imili allanngortinneqarnikuunngilaq, taamaattumillu sikkilit innaallagiatortut nunatsinni inerteqqutaatinneqarput.
Tabithe Sværd sikkilini innaallagiatortut ukiut arlallit qaangiummata pisiarai, maannalu quiminiitittariaqalersimavai. Sisimiuni niuerniarniatilluni kammaniluunniit pulaarniartillugit iluaqutigilluartarsimagaluarpai.
- Pisiniapallanniartillunga imaluunniit kammama arlaat alakkapallanniaraangakku atortarpakka. Iluareqaakka, ingammik qummukajaakkoortussaatillunga. Silatitsinniittut atoriaannaajunnaarlugit uggornarpoq, Tabithe Sværd oqarpoq.
Sikkilit quimiiginnartariaqartut
Kalaallit Nunaata politiivisa innaallagiatortunik sikkilertunik naammattuuigaangamik maannamut inerteriinnartarlutik oqaatigaat, maannamiillu innaallagiatortunik sikkilertunik naammattuuigaangamik akiliisitsisalerlutik, KNR-imut aamma paasissutissiipput.
Nunatsinni sikkilit innaallagiatortut akuerisaaleqqinnissaasa tungaanut Tabethe Sværdip sikkilini quimiisiinnarniarpai.
- Qujanartumik sila issileriarmat sikkilikka quitsinnut ileqqammerikkalu taamatut nalunaaruteqartoqarpoq, quimiitsiinnarallassavakkalu. Maannakkummi atorukkit politiiniit unitsitaanissara annilaangagaara, Tabithe Sværd oqarpoq.
Sikkilit innaallagiatortut ulorianarsinnaasut
Tabithe Sværdili nunatsinnilu innaallagiatortunik sikkilillit allat nuannaarutissaqangajalerput.
Tassami Ineqarnermut Attaveqaasersuutinullu Naalakkersuisoq Hans Peter Poulsen (S), Danmarkimi angallannermut ministerimut nunatsinni sikkilit innaallagiatortut akuerisaalernissaat noqqaassutigaa.
- Aqqusinertigut angallannermut suliassaqarfimmi ullutsinnut naleqquttunik Kalaallit Nunaanni inatsiseqarnissarput Naalakkersuisut pingaartittorujussuuaat. Taamaattumik Angallannermut ministerip ingerlaavartumik oqaloqatigisarnerani aqqusinertigut angallannermut inatsisit nutarterneqarnissaat pillugu oqaloqatigiittarneq aammalu pisariaqarpat kimigiisernissaq, ingerlatiinnassavara, Hans Peter Poulsen tusagassiuutinut nalunaarummi allappoq.
Tabithe Sværdip taamatut aaliangiisoqarnera ajorinngilaa, tassami sikkilit innaallagiatortut nutaaliaanerit sukkasoorujussuusinnaasut taamaattumillu misilittagaqarfiginngikkaanni ulorianarsinnaasut oqaatigaa.
- Uanga sikkilikka immaqa sikkilit saqqummertut siulliit ilagivaat taamaattumik sukkavallaarnatik. Sikkilit nutaanerusut misilinnikuusakka sukkasoorujussuugamik immaqa taava ilinniaqqaarneqarsinnaallutik. Assersuutigalugu kangerlussuarmi sikkilit attartortakkat taakkua misilikkakkit sukkangaatsiarput assut, taamaattumillu sungiusimanagit apeqqusernarsinnaalluni, taamaattumik inerteqqutaaginnassappata ajorinngilara, Tabithe Sværd oqarpoq.
Danmarkimi sikkilinut innaallagiatortunut inatsit naapertorlugu motooria tiimimut 25 kilometeri sukkassuseqalersitsilluni ikiuussinnaavoq, qaangerneqarpallu nammineq unissapput. Tamanna ilutigalugu qallunaat oqartussaasuisa sikkilinik innaallagiatortunik atuisut 15-ileereersimanissaat innersuussutigaat.
Aqqusinertigut angallannermut aqutsisoqarfik nalunaarummut allannguutissamut maanna missingiusiussaaq, taamaalilluni nunatsinni tamanut tusarniaasoqassalluni.
Taava Aqqusinertigut angallannermut aqutsisoqarfiup aalajangiinnginnerani nunatsinni politikerit isummerfigeqqaassavat.