SIK Sermersoorlu tikkuartaattut
SIK-p isornartorsiuinera kusanaappoq eqqoranilu. Kommuneqarfik Sermersuup avataanit tikittunut sulisinnaanermut akuersissutinik amerlavallaanik tunniussisarneranik SIK-p sapaatip-akunnerata siuliani isornartorsiuineranut Kommuneqarfik Sermersooq taama akissuteqarpoq.
- SIK-p siulittaasuanut tulluanngilluinnarpoq, oqalliffimmi tassani kommuni ataaseq assuarliutigissallugu, Isumaginninnermut, Suliffeqarnermut Inuussutissarsiornermullu Ataatsimiititap siulittaasua Malene Lynge oqarpoq.
Ajornartorsiuteqartoqartorli SIK-p siulittaasuata Jess G. Berthelsenip attappaa:
- Piffissami kingullermi aamma takuneqarsinnaavoq avataaninngaanneersut Nuummi amerlangaatsiartut, aammalu pisiniarfeqarfiit eqqarsaatigalugit soorlu takusinnaasara malillugu amerliartorput avataaninngaanneersut, isumaqarpungalu taanna pissusissamisuunngitsoq, SIK-p siulittaasua Jess G. Berthelsen oqarpoq.
Aamma atuaruk SIK: Sulisussanik tikisitsisoqassanngilaq
Isornartorsiuinerli Malene Lyngemit illuatungilerneqarpoq, oqarluni Kommuneqarfik Sermersuumi suliffissaaleqisut ataatsimut isigalugit 8 procentiusut Nuummi 5 procentiusut.
- Jess G. Berthelsenip ilungersuutigisariaqaraluarpaa, nunatsinni ilaasortaminut tamanut suliffissaqartitsinerup qaffassarnissaanik sorsuutiginninneq, paarlattuanik pissutissaqanngitsumik kommuni ataaseq appisaluunnagu - taamaaliorneq ikkappallaaqaaq, Malene Lynge oqarpoq.
Inatsisit naapertorlugit avataanit sulisinnaasunut akuersissutit ingerlaannaq tunniunneqartarput qinnuteqaat kommunimit sapaatip-akunnerisa marluk iluanni suliarineqarsimatinnagu, ukiulli kingulliit ingerlaneranni taamaattunik suliaqartoqarsimanngilaq, qinnuteqaatillu amerlasuut itigartinneqartarput:
- Kisianni sulisussarsiornermi nunaqavissunik pissaqartinnagu itigartitsisinnaanngilagut. Taamaaliornissaq inatsisinik unioqqutitsineruinnarani aammali suliffeqarfinnut nunatsinnilu aningaasaqarnermut akornutaassaaq, Malene Lynge oqarpoq.
Jess G. Berthelsenilli isornartorsiuinini attatiinnarniarpaa.
- 3000-inik maannakkut suliffissaaleqisoqarpoq, taamaattumik aamma sinerissami suliffissaaleqisut isumaqarpunga sulisussaaleqiffiusunut suliartortissinnaanissaat tamatta pikkorinneruffigisariaqarivut. Tassanilu pingaaruteqarpoq kommunerujussuit tassani suleqatigiilluarlutik sinerissami suliffissaaleqisorpassuit illoqarfinni sulisussaaleqiffiusunut, SIK-p siulittaasua Jess G. Berthelsen oqarpoq.
