SIK: Sulisussanik tikisitsisoqassanngilaq
Tunisassiorfimmimi sulisussaaleqipput, saarullittagummi asiuinnassanngippata sulisussaqarnissaq pisarisqarluinnarpoq, Sisimiuni aalisartut siulittaasuat, Adam Dahl, oqarpoq.
- Tamaammat nunani allaniik sulisussarsisariaqarpugut, taanna oqarpoq.
- Allatut ajornaqaaq. Nunami maani aningaasarsiorneq pimoorunneqassappat, taava inuiaat kalaallit oqarfigisariaqarput; sulerusunngikkussi, nunani allamiunik sulisoqalerniarta, Adam Dahl oqarpoq.
Aamma atuaruk VIDEO SAPP: Nunani allaniit sulisussanik tikisitsisa
Royal Greenland Sisimiuni tunisassiorfiata pisortaat isuma paasilluarsinnaavaa.
- Aamma uagut maani eqqarsaatigisinnaavarput. Maani takusinnaasarput malillugu nunaqqatitsinnit sulisinnaasut artorsinaasagut naammanngillat. Taanna nassuerutigissavarput, Hans Lars Olsen, Royal Greenland Sisimiuni tunisassiorfiani pisortaasoq oqarpoq eqqaallugulu, Sisimiuni 50-inik suliffissarsiortoqartoq.
Royal Greenland nittartakkamini aamma allappoq sulisussanik Maniitsumi 20-nik Qasigiannguanilu aamma 30-nik amigaateqarluni.
SIK isumaqataanngilaq
SIK-lli siulittaasuata Jess. G. Berthelsen nunani allaniit Sisimiunut suliartortoqartitsinissaani isuma itigartilluinnarpaa:
- 3000-inik maannakkut suliffissaaleqisoqarpoq. Taakkualu salliutillugit sulisinniartariaqarivut isumaqarpunga.
SIK-illu oqaluttuarpoq Royal Greenland A/S peqatigalugu sinerissami allaniit sulisussanik 50-inik Sisimiunukartitsinissaq maannakkorpiaq sulissutigigitsik.
Aamma Royal Greenlandip suliffeqarfiutaa sooq sulisussaaleqisarnersoq SIK-p suliffeqarfiullu maannakkorpiaq misissoraat siulittaasoq oqarpoq.
Misissuinermilu sulisut bonusisisassanersut, isumaqatigiissutit, aningaasallu isumaginninnikkut tunniunneqartartut ilaapput.
Tamaammat aperaarput, misissuineq naammassitinnagu ilaasortani suliartornaveersaaqqusimanerai:
- Naamik, taammaattoqanngilaq. Kisianni aamma unammilleqatigiinneq ugguuna ajunngilaq, Royal Greenlandimi sulisimasut aalisakkerivimmut nutaamut suliartorsimasut, taakkua immaqa annerusumik aningaasarsiaqartitsimmata.
