Sermersuumi Qaasuitsumilu akiitsut amerlanersaapput
Kommuneqarfik Sermersuumi innuttaasut 350 millionit koruunit missaannik Nunatta karsianut akiitsoqarput.
Kommunillu innuttaasuisa ilaasa meeqqanut akiliutaasa akilerniarneri ajornartorsiutigisimavaat. Meeqqanullu akiliutinut akiitsut pillugit suliat 22.000-it ullumikkut suliarineqarlutik.
Aamma atuaruk Pisortanut akiitsut amerliartupiloortut
Taamaakkaluartoq akiliisitsiniartarnerit ingerlanneqarnerat Kommuneqarfik Sermersuumi aningaasaqarnermut pisortap, Lars Møller Sørensenip ajortussaqartinngilai, aningaasalli sukkanerusumik akilertinniarnissaat anguniarlugu sakkortunerusumik periuuseqartalernissamik isumaliuteqarlutik, Lars Møller Sørensen oqarpoq.
- Assersuutigalugu angajoqqaat ulluunerani paaqqinnittarfinnut akiliinngippata, meeraat paaqqinnittarfinninngaanniit anisitaasinnaassapput, Lars Møller Sørensen oqarpoq.
Qaasuitsup Kommuniani innuttaasut 243 millionit koruuninik akiitsoqarput. Tassanilu eqqaavilerinernut akiitsut alliartorput, katillugillu 13 millionit koruuniullutik.
Aamma atuaruk Misileraanikkut akiitsorpassuit ikilisarniarneqassapput
Namminersorlutik Oqartussat aningaasanik akiliisitsiniarnerinut suliat naammaginagit, Qaasuitsup Kommuniata borgmesteria, Ole Dorphip, piffissat ilaanni akiliisitsiniartartunik nammineq sulilersitsisariaqarsimallutik KNR-imut oqarpoq.
Ole Dorphip Namminersorlutik Oqartussat kommunillu suleqatigiilluarnerunissaat maannakkut ujartorpaa.
- Uagut kommunini aamma oqartussaassutsimik annikittunnguamilluunniit pigisaqarusuppugut. Suleqatigiikkutta pitsaasup tungaanut aallartoqarsinnaammat, Ole Dorph oqarpoq.
Qeqqata Kommuniani akiitsut ikinnerpaapput. Kommunip innuttaasui 100 millionit koruuninik akiitsoqarput.
Kommune Kujallermi innuttaasut 111 millionit koruuningajannik akiitsoqarput.
