Namminersorlutik oqartussat nutaamik isumaqatigiissusiortut
Ineqarnermut, Sanaartornermut Attaveqaqatigiinnermullu naalakkersuisoq KNR-imut allakkatigut taama nalunaarpoq.
Knud Kristiansen naapertorlugu Geodatastyrelse annerusumik tunniussissaaq, aqutsisoqarfiummi isumaqatigiissutaareersoq malillugu kingusinnerpaamik 2018-imi Nunatta kujataata Kitaatalu imartaani immap assingi 73-it naammassereersimasussaagaluarpai.
- Assersuutitut taaneqarsinnaapput immap assingisa atuisunut paasiuminartuunissaat, Kalaallit Nunaannilu suli assiliorneqanngitsut nutaamik pilersaarusiuunneqarnissaat, Knud Kristiansen taama allappoq naatsorsuutigalugulu qaammatini aggersuni erseqqinnerusumik paasisaqarumaarluni.
Aamma atuaruk Politikerit: Nunap assingi pillugit Danmarkimut isumaqatigiissut nutarterneqassanngilaq
Isumaqatigiissutaagaluartoq atorunnaarpoq, Geodatastyrelsemi Kalaallit Nunaata imartaanik assiliortartunit 15-iusunit 14-it soraarniuteqarsimammata. Taama iliorput naalakkersuisut sullivik Københavnimiit Aalborgimut novembarip aallaqqaataani nuunniarmassuk.
Kinguartitsineq folketingimut ilaasortanit Nunatsinneersunit Siumumit Inuit Ataqatigiinnillu assut isornartorsiorneqarput, oqarlutik naalakkersuisut immap assingi pillugit nutaamik isumaqatigiissusiussanngitsut.
Taarsiullugulu Nunatta sakkortuumik piumasaqaatigissagaa isumaqatigiissut malillugu immap assingi suliarineqassasut.
Immap assingi nutaat qaqugu naammassineqassanersut suli ilisimaneqanngilaq. Geodatastyrelseli naapertorlugu taakku ukiut arlallit qaangiuppata aatsaat naammassineqarsinnaapput.