Savalimmiormiut tunngaviusumik inatsit pillugu taasilersut
Naalakkersuisut siulittaasuata Aksel V. Johannesenip ammaanersiorluni inatsisartuni oqalugiarnermini tamanna erseqqissarpaa.
Naalagaaffeqatigiinniilli aniniarnerunngitsoq savalimmiormiut Folketingimi ilaasortaatitaat Sjurdur Skaale maanna taama oqarpoq.
- Naamik tamanna eqqarsaataanngilluinnarpoq. Aniniarnianngilagut.
Sjurdur Skaalemut savalimmiuni socialdemokratit sinnerlugit Folketingimi ilaasortaasumut tassaaneruvoq tunngaviusumik inatsiseqalernissaq, erseqqissarniarlugu Savalimmiuni oqartussaasut qullersaasut tassaasut inuiaat savalimmiormiut.
- Inoqarpoq danskit tunngaviusumik inatsisaa pillugu assortuutitserusuttunik, kisianni Savalimmiut tunngaviusumik inatsimmiit pisinnaatitaaffeqarnerupput.
Sjurdur Skaalep innersuussutigaa Savalimmiut namminneq inatsisartoqarmata, namminneq akileraartarnermut aaqqissuussaqarlutik namminnerlu tapersersukkaminnik ilageeqarlutik.
Savalimmiut folketingimi ilaasortaatitaat naapertorlugu taakku arlaannaalluunniit Tunngaviusumik inatsimmit piginnaatitsissutaanngillat.
Taamaattumik paasisinnaannginnerarpaa savalimmiut namminneq tunngaviusumik inatsisitaarnissaat ajornartorsiutaassappat.
- Savalimmiut Danmarkimut atanerata annikilliivigineqarnissaanik oqalunneq isumaqanngilluinnarpoq, ukiorpassuarnimi Tunngaviusumik inatsisip killiliussai qaangerlugit ingerlasimavugut.
Savalimmiut tunngaviusumik inatsisissatut siunnersuutaat Tunngaviusumik inatsimmut akerliusutut arlaleriarlutik inatsisinik atuutsitinermut ministereqarfimmit itigartinneqartarsimapput.
Naalagaaffeqatigiit siuttuisa kingullermik ataatsimiinneranni danskit ministeriunerata danskit tunngaviusumik inatsisaata iluaniissappat savalimmiut tunngaviusumik inatsisitaarnissaat tapersersorpaa.
Maannamulli inatsisissatut suli siunnersuutissaqanngilaq, taanna aappaagu ukiakkut taasissutigineqartussaq pillugu danskit naalakkersuisuilu aaqqiissaqqaarlutik Skaale oqarpoq.
- Maannakkut atuuttut ileqqussanngortikkusuinnarpavut, Lars Løkkelu isumaqarpat maannakkutut Tunngaviusumik inatsisip iluaniittut ajunngilluinnassaaq, Skaale oqarpoq.