Politikki

URANI Sara Olsvig: Tamat oqartussaaqataanerat kalluarneqarpoq

Uranimit piiasoqarsinnaanissaa pillugu innuttaasut taasitinneqarnissaannik IAp siunnersuutaa Inatsisartuni ullumi oqallisigineqanngaatsiarpoq. Oqallinnermi akunnernit tallimanik sivisussuseqartumi partiit naalakkersuisooqataasut siunnersuummut tapersiinnginnerat erserpoq.

Allattoq Thomas Munk Veirum

apriilip 28-at 2016 18:00

Nutserisoq Connie Fontain

- Inatsisartut affanngajai innuttaasunilu inupparparujussuit uuminga apeqqusiisut tusaaniarneqartariaqarput naaperiarneqartariaqarlutillu.

Sara Olsvig urani pillugu Inatsisartut oqallinnerisa naammassineqaqqammernerani taama oqarpoq.

Uranimik piiaasoqarnissaanut apeqqummik innuttaasut tusaaniarneqartariaqartut, Inuit Ataqatigiit siulittaasuata oqallinnerup ingerlanera tunngavilersoqattaarpaa.

Inuussutissarsiornermut, suliffeqarnermut niuernermut nunanullu allanut tunngasunut naalakkersuisoq, Vittus Qujaukitsoq Naalakkersuisut sinnerlugit peqataavoq, taassumalu erseqqissaatigaa Sara Olsvigip, IA-llu oqariartuutaat arlaatigulluunniit naalakkersuisunit taperserneqanngitsut.

- Partiit, uranimut naaggaarluinnarnissamik atorunnaarsitsiniartut, qinersinermi ajugaapput, Vittus Qujaukitsoq ilaatigut oqarpoq.

Aamma atuaruk Isummat allanngorpata Namminersorlutik Oqartussat taarsiisariaqalersinnaapput

Siumup politikkikkut oqaaseqartartuata, Jens Erik Kirkegaardip 2014-imi qineqqusaartoqarnerani oqaatigineqartut innersuussutigalugit naalakkersuisut taperserpai.

- Siumumiit qinersinissamut ullut marluinnanngortut oqarpugut, qinersinermi ajugaagutta, innuttaasunik taasititsiniarnata.

Sara Olsvigili isumaqarpoq, Inatsisartunut qinersinermi kikkut qinigaanerat, Nunatta uranimik piiaasinnaaneranik tuniniaasinnaaneranillu aalajanngiisuusinnaanngitsoq.

- Inatsisartuni qinersineq tassaanngilaq, uranimut angerneq imaluunniit naaggaarneq, tamatta tamanna ilisimavarput.

Aamma atuaruk Lynge siunnersuummini kisimiivippoq

Naalakkersuisooqatigiit tamarmik siunnersuut itigartinneqassasoq oqarput, taamaammallu IA-p siunnersuutaanut, maajip 20-iani isummerfigineqartussami amerlanerussuteqartut anngernissaat ilimanarunnaarpoq.

Siunnersuullu taasinikkut itigartinneqassappat IA qanoq iliussanersoq, Sara Olsvigip itinerusumik oqaasertalerumanngilaa.

- Maajip 20-iani takussavarput qanoq pisoqassanersoq taava tassanngaanniit ingerlariaqqikkumaarpugut, IA-p siulittaasua Sara Olsvig oqarpoq.