Politikki Inuussutissarsiutit

URANI Lynge siunnersuummini kisimiivippoq

Steen Lynge nunatsinni aatsitassarsiornermi piiakkat radioaktiviusinnaasunik qummut 0,05%-imik qaffasinnerpaaffiliisoqarnissaanik innuttaasunik isumasiuilluni taasisitsisoqarnissaanut siunnersuutaa amerlanerussuteqartunit tapersersorneqanngilaq. Namminerluunniimmi parteeqataannit Atassutikkunnit siunnersuutaa tapernersorneqanngilaq. Tamannali isumaqanngilaq Steen Lynge partiiminut akerliusoq.

Allattoq Bibi Nathansen

apriilip 27-at 2016 18:22

- Atassummi partiimi siullermiilinngilagut, soorunami, akunnitsinni isummat assigiinngissinnaanerat, tamannalu inissaqartinneqartarpoq naliginnaasumik. Soorunami ajuusaarpunga. Allannguutissamilluunniit partiit allat isumaqataannginnerminnik, imaluunniit Atassumminngaanniit allannguutissamik siunnersuummik aggiussinnginnerat ajuusaarutigivara, Steen Lynge Atassummeersoq oqarpoq.

Ullumi oqallittoqareernerata kingorna paasinarsivoq naalakkersuisoqatigiinni partiit, taamaalilluni Steen Lyngep partiata Atassut aamma, siunnersuummut isumaqataanngitsut.

Allaat Siverth K. Heilmannip oqaluttarfimmit ajuusaarutigaa parteeqatini taama siunnersuuteqarsimammat.

- Tassa ugguarivara oqareernittuut aatsaaginnaq paasititsiniaanerpassuit oqallinnerpassuit pereersut, minnerunngitsumillu allaqqavoq nul-tolerancip atorunnaarsinneqarneranut isummersimaneq Inatsisartuni amerlanerussuteqartunik aalajangerneqarpoq. Tassuuna ugguarinnissutiga aallaaveqarpoq, Siverth K. Heilmann oqarpoq.

Aamma atuaruk Urani Inatsisartuni ullumi oqallisigineqassaq

Ersarilluinnartumik isumaqatigiinngikkaluartut Siverth K. Heilmannip Steen Lynge partiimi siulittaasut tulliuinnassanersoq isummerfigerusunngilaa.

- Uanga taanna isummersorfigisinnaanngilara. Steen Lynge Atassut sinnerlugu Inatsisartunut ilaasortaavoq, Atassut sinnerlugu Steen Lynge nammineq siunnersuuteqarpoq, uanga attavigeqqaarnanga. Taamaattumik tassani isummersinnaanera siunnersuuteqarsinnaaneralu, oqareernittut ersarissorujussuarmik, mattunneqannginnnami siunenrsuuteqarsinnaavoq. Taavalu isummersorfigiinnarparput, Siverth K. Heilmann oqarpoq.

Steen Lyngep siunnersuuteqarnermigut partiiminut akerliugaluartoq, Atassut qimalinnginnerarpaa.

-Soorunami ullormiit ullormut qulakkeersinnanngilarput aqagu susoqassanersoq, kisanni politikikkut anguniagaqarusuppunga, nunarput sullillugu. Taamaattumik, aap, naatsorsuutigisinnaavarsi ingerlaqqinnissara, Steen Lynge oqarpoq.