Sapaatip akunneranut akunnerni sisamani timigissartaruit inuunerit sivitsorsinnaavat

Østerbro-undersøgelsemik taasami 1976-imili arnat angutillu 12.000 timigissariaasaat malittarineqarsimapput.

Østerbro-undersøgelsemi nakorsat ilisimatusartullu ukiuni 33-ni kingullerni misissorsimavaat ullut tamaasa issiaannartarutta, akuttunngitsumik timersortarutta imaluunniit timersortorujussuugutta uagutsinnut qanoq sunniuteqarnersoq.

Uummatip nakorsaa Peter Schnoor misissuinermut akisussaasuusoq oqaluttuarpoq timersoriaaserput qanoq ittuunersoq pingaaruteqartupilussuusoq.

- Inuit aalarpiarneq ajortut tunngaviliukkaanni ukiuni ima amerlatigisuni inuussasut oqarsinnaavugut. Taava timerput aalatillattaalerutsigu inuunerput ukiunik arlalinnik sivitsorsinnaavoq, taavali sapaatip akunneranut akunnerni sisamani timersortalerutta issiaannartunut naleqqiulluta ukiunik 5,6-nik inuunerput sivisunerussaaq.

Taamaattumik nalaasaarfimmiiginnartartunut ilaaguit qimattariaqartassagit, Peter Schnoor oqarpoq.

- Uummatinnut iluaqutaassaaq, sukkornermik nappaateqarlersinnaanerit annikillissaaq, aavillu ingerlaarneranut iluaqusiissalluni. Ataatsimut isigalugu timersorneq sunniuteqaqaaq, isumaqarsimanngikkaluarpugulli taama annikitsigisup taamarsuaq sunniuteqarsinnaanera.

Sissuertariaqarporli, naak timersorneq peqqinnaraluartoq timi aamma qasuersaartussaavoq. Taamaanngippat timersorneq akerlianik sunniuteqassaaq; ingammik sakkortuumik timesortaraannni.

- Inuit ilaat ullormut marloriarlutik timigissartarput, tamannalu timimut nungullarsaataaginnartartoq misissuinerup aamma paasinarsitippaa.