Sapaatip akunnera Nepalimi illup aseqqukuineereerluni 101-nik ukiulik suli uumasoq nanineqarpoq
Nepalimi sakkortuumik sapaatip akunnera siuliani nunap sajorujussuarnerata kingorna qammakkat iluaniit inunnik suli uumasunik annaassiniaasut qaqitseqattaarput.
Inuit pingasut ullumi sapaammi qammakkat nunallu ataanni ulluni arfineq pingasuni kiggusimareersut suli uumasut nanineqarput, Nepalimi oqartussat nalunaarutigaat.
Ullut arfineq marluk matoorussaaqqasoq
Arfininngornermilu angut 101-nik ukiulik suli uumasoq nanineqarpoq. Illumi nakkaassimasup ataani ulluni arfineq marlunni uninngareersimasoq, Illoqarfiani politiusup ilaata, Arun Kumar Singh nutaarsiassaqartitsivimmut AFP-mut taama oqarpoq.
Aamma atuaruk Nuna sajummat inuit 6621-t ajunaarput
Nunaqarfimmi Kerabarimi Syaulip immikkoortuaniittumi ullumi sapaammi arnat marluk angullu ataaseq qarmakkat iluanit qaqinneqarpit, Politiinit oqaaseqartartoq, Ram Bahadur Nepali nunap immikkoortuani Sindhupalchowkimiit tyskit nutaarsiassaqartitsiviannut taama nalunaarpoq.
Neriuutaarukkaluarpoq
Taassuma ilanngullugu oqaatigaa, taakkunani marluk marrarmik illuikkiap ataani kiggusimasimasut, pingajuallu nunap sakkortuumik sajunneranik nunap sisoorneranut ilanngussaasimasoq. Annattoq taanna nunap iluani kiggusimasoq qaqinneqarpoq, politiinit oqaaseqartartoq oqarpoq.
Taakku pingasut maanna napparsimavimmi uninngatinneqarput.
Taakku nanineqarput, Nepalimi nunamut namminermut ministereqarfimmiit oqaaseqartartup annassimasunik naniseqqinnissamut neriuutaarullutik oqaatigereernerata aqaguani.